Fiona追求代表作 要無悔今生

追求完美的薛凱琪(Fiona),不容許做事半桶水,她認為人生苦短,不想將來後悔,到死了那天也找不到一部代表作,所以她堅持重質不重量,認為要對自己唱歌事業負上責任,為個唱推掉搵錢機會。

為新歌《倒刺》MV執導的Fiona,指這首歌是講贖罪,她說:「之前經歷過啲嘢,明白到係一定要解晒啲心結,原諒所有hurt(傷)過我嘅人,如果心裏面成日都有怨氣,做咩都唔會好,其次最緊要就係原諒自己,所以呢首歌對我意義好大,我就請纓做導演。」

MV得唱片公司揼錢給她製作,令她好感恩,她說:「啲錢唔係畀你玩,所以我花咗好多時間去做準備,搵晒我啲電影朋友做班底。」

將來有機會她也希望自導自演,但相信不會是這兩年的事,Fiona說:「我有好多嘢想做,但我要肯定每樣嘢都做得到最好先做,唔想每樣嘢半桶水,好似呢個MV,要拍就拍到最好,由自己去剪片,逐秒咁睇,睇咗四晚,晚晚揀成五個鐘。」

對事業負責

為了在紅館舉行的演唱會,她推掉了電影、電視劇等工作,雖然金錢上有損失,但她覺得值得,她說:「我寧願產量少啲,但要質素好,人生苦短,如果做得咁唔完美,做嚟做咩呢?到我死咗嗰日,係做過好多嘢,但冇一樣係代表作,你點對得住自己?點對得住真係用錢買你產品嘅觀眾?要咁諗你先會無悔。」

雖然她喜歡拍戲,但她因為喜歡唱歌才入行,她說:「我要為自己的歌唱事業有番啲責任。」

長靴遮瘀痕

將於明晚舉行處女演唱會的Fiona昨日出席HUNTER活動,她坦言已到紅館睇舞台,她說:「好宏偉,太感恩。」穿上品牌長靴的她笑言成功遮住腳上瘀痕,她說:「排舞搞到隻腳瘀晒,已經叫設計師造嘅歌衫可以遮得到。」問到為何仍出席活動?Fiona說:「之前推咗好多戲同廣告,今次幫補番啲。(你都有幾千萬身家?)我係獨女,好大負擔。」

文:音樂組

攝:司徒國榮

Hair:Jo Lam@Queens Private-I

Wardrobe:blessed are the meek

Makeup:Jessica Chan Makeup Workshop