容祖兒扁嘴：搞到我好似好蠢
「龍兒戀」自爆出後傳聞滿天飛，身為當事人的容祖兒昨日繼續「封嘴」，強調稍後會搵何韻詩傾，對於網友勁插劉浩龍借她宣傳及「抽水」，腹背受敵的祖兒即扁嘴說：「搞到我好似好蠢咁。」
容祖兒、黃耀明、盧凱彤及林二汶等人昨出席活動，連日來以長袖衫示人的祖兒昨日穿上背心襯短裙，除下昔日的透明魚絲情侶鏈，心情靚爆的祖兒受訪期間有講有笑，但提到「龍兒戀」均三緘其口，曾揚言會搵阿詩傾的祖兒忙完宣傳就會找對方，對於蘇永康為她出頭炮轟一眾網民，祖兒說：「各位朋友對我嘅評價唔回應喇，多謝晒。」
希望得到祝福
由於劉浩龍近日推出專輯及拍劇，即遭網友狂轟他抽祖兒水，祖兒終開腔說：「唔好咁諗，對我好唔公平，搞到我好似好蠢咁。（大家都戥你不值？）多謝大家，希望有朝一日得到你哋祝福。（拍拖搞到咁好慘？）係咁㗎啦，唔通唔明咩！人工包埋。」阿詩早前笑言會孤獨終老，祖兒湊熱鬧說：「我自己都好難講，邊話得埋。」早前與浩龍到泰國蘇梅島拍拖的祖兒被問到有否在當地閃婚？她反應極大高8度說：「黐線，唔係拉斯維加斯先得咩？」
譚詠麟讚得體
至於譚詠麟在微博上載與她的合照，並留言大讚她得體及有大將之風，祖兒說：「咁咪好囉。（叫佢日後小心講嘢？）我冇咁嘅資格。」還透露前晚與多位巨星錄奧運歌，問到同場有否阿詩及劉浩龍？祖兒說：「冇呀。」而與阿詩及祖兒同屬好友的明哥表示希望記者能給予兩人空間，問到他身份會否感尷尬？明哥說：「唔會，我好公平，每個朋友都係獨立一個File。（期待佢兩個同台？）相信誤會一定解決到，睇吓係咪真心好朋友，有需要我願意做橋樑。」
文：音樂組