鄭希怡險癱：回家感覺好好
英皇歌手鄭希怡（Yumiko）於上月中在布吉跌落山坡，導致頸椎兩節移位，昨晚她戴着頸箍，在化妝師男友Andy、陳小春和醫生護送下返港，並由救護車直送養和醫院接受治療，幾乎癱瘓的Yumiko說：「回家感覺實在好好！」
Yumiko於上月中與男友Andy飛布吉為友人慶生，怎知失足跌落山坡，導致頸椎移位昏迷兩日，清醒後一直留在當地留醫，直至昨日傷勢好轉，在男友、陳小春及醫生等人陪伴下返港。
生命比錢重要
昨晚Yumiko抵港後，即由男友陪同下乘搭由保險公司安排的救護車到達養和醫院，並自行落車。化了淡妝一臉倦容的Yumiko站着讓傳媒拍照後，便坐在輪椅接受訪問，她說：「醫生以健康理由，唔畀我咁快搭飛機，怕喺空中對肺唔好，今次返嚟全程有醫生陪，隨時幫我量血壓，回家感覺實在好好！」
問到搭機期間有否不適？Yumiko說：「起機同降落有少少唔舒服，好在有醫生指導。」她未有透露在布吉接受了甚麼手術，只是手術後有點痛，至於有否買保險？她說：「有買，但我冇理，同生命比錢唔重要。」之後就在男友和英皇同事陪同下入院接受檢查。
肺部受壓漏氣
而陪同Yumiko乘機返港的陳小春，昨晚在機場全程黑面，問Yumiko傷勢及有冇後遺症等問題，他只答：「問英皇！」期間有電視台舉咪牌，小春更發爛渣說：「依家喺度做乜啫？」另一位同行友人則透露Yumiko當日跌落山坡後一度「失蹤」：「我哋周圍搵，佢好似周星馳啲戲，大字形咁瞓喺度，小春見Yumiko身邊好多大石想抱起佢，當時Yumiko仲清醒大嗌：『唔好掂我』。」
他們急送Yumiko入院，當地醫生指幸好他們處理適當，否則Yumiko隨時癱瘓！友人說：「Yumiko冇畀樹枝插到肺，但咁高跌落去撞到肺，受到好重壓力，好似有啲漏氣情況，依家只係頸椎移位，山坡下面好多竹，好在佢跌歪咗，否則會插入身體。」堅強的Yumiko出事後沒有喊，並樂觀面對，估計要休息半年。
文：音樂組