邱子傑覓賢內助 甘苦與共
楊受成外甥邱子傑憑慧眼打造出「高級眼鏡王國」，除了用「心」去經營，最重要是懂得寓工作於娛樂，加上一位好的賢內助，才能事半功倍。他與太太志趣相投，令他的事業更上一層樓。
邱子傑（Jeffrey）97年開手錶專門店「歐洲坊」，2001年開設眼鏡店「溥儀」。眼鏡店一開始已計劃要走高級眼鏡路線，對他來說並不是容易的事，當中亦遇上不少挫折，從中學懂不少，造就今日的他。Jeffrey說：「開『溥儀』時，市場上冇高級眼鏡店，我好好彩，timing同市場變化脗合，啲人愈來愈捨得花錢買眼鏡，十年前成個亞洲市場都冇高級眼鏡，但歐洲、美國就有，覺得亞洲好有潛力。」
金融風暴與沙士
Jeffrey在商場上打滾多年，遇過不少風浪，但每次都令他變得更堅強，從中吸取更多的經歷，他說：「生意遇風浪遇挫折實在太多次，好似我97年開『歐洲坊』，同年就遇上金融風暴，經營上好辛苦，生意淡靜。」好不容易捱過金融風暴，當生意漸有起色時，Jeffrey卻又遇上另一個危機，他說：「當時好想快啲打入大陸市場，02年喺大陸開咗4、5間店眼鏡店，但因為時機未到，都冇法做（落去），要close咗先。」
不過，翌年的SARS（2003年），卻是Jeffrey口中「最慘」的時間：「SARS嗰時，中環舖頭好多都closed，市民唔敢出街，又點會有人買嘢？生意靜得恐怖，好難經營。（有冇諗過放棄？）家人有叫過我不如放棄，但可能我比較好勝，對自己眼光有自信，心諗只要過到呢關就可以。」樂觀的他，經歷大風大浪之後，有如此結論：「我依然覺得自己好好彩，曾經遇到困難，好多嘢都解決到，令你學到更多。」
Jeffrey在工作上要求很高，凡事一定盡力做到滿意，他說：「太太曾話過，『過得到你自己就OK，因為你要求太高』。」Jeffrey與太太李茂琪情投意合，對靚的事物及高級的銷售品一向情有獨鍾，令他能視工作為興趣，他說：「我同太太都好鍾意逛名店，睇靚嘢，平時星期六、日陪屋企，我哋都係去行街shopping，將工作同興趣融為一體，做嘢都開心啲，亦不會脫節，寓工作於娛樂，如果做啲唔鍾意做嘅嘢，點都唔會做得好。」
互訴家中大小事
Jeffrey與太太結婚15年，被公認恩愛的一對，他大讚太太是賢內助：「我同太太感情好好，雖然我唔係好多私人時間，又成日飛，但空閒時第一時間就返屋企，如果工作上可以，亦會帶同太太一齊飛。我在外國嘅費用使得最多係長途電話費，我哋成日講電話，大家發生大小事都會講餐飽，大家都好鍾意聽，呢啲係人夾人。」在Jeffrey心中，最感激太太的無限量支持，無論他做任何事，或是遇上任何挫折，太太李茂琪也會全心全意地支持，他甜笑說：「太太幫咗我好多。佢其實係個好叻嘅人，特別喺管理方面，如果出嚟工作，佢一定係好傑出嘅管理人員，依家做家庭主婦持家亦好有條理，屋企大事小事，佢都可以handle到，完全唔會加重我嘅負擔。」
Jeffrey表示做任何事都要花心思、花時間去經營：「當初打入大陸市場，很多人都未知你的定位，要花時間等人接受，你做到有口碑自然有人接受，今年好多一線商場都有搵我哋開舖，以前要求人，依家啲人自動叫上門開，但自己就唔想太快，依家平均一個月喺大陸開一間分店。」
27歲開第一間舖
Jeffrey花在錶舖與眼鏡店的時間一半一半，他說：「錶舖競爭好大，因為有歷史嘅錶舖好多，個個都係前輩，我做錶時好後生，27歲開第一間舖，因為太多競爭，要花好多時間，想將佢做到最好，『力不到不為財』，時間永遠不足，工作時間好長係一定嘅，但要識得分配。」
Jeffrey被問到現在是否回報期？他笑着說：「我睇得好遠，唔急於回報，所以會不停投資落店舖，覺得值得就會去做。眼鏡店由當初得十幾個員工，到依家有600幾個，有38間店舖，我睇嘅係好長線發展，有好多發展空間。」
與子女關係如兄弟
Jeffrey與李茂琪育有一對仔女，兒子12歲、女兒9歲。Jeffrey自言雖是嚴父，但子女乖巧，與他們的關係就如兄弟般，他說：「好彩我啲小朋友好乖，自律又識諗，我亦畀好多空間佢哋，個仔有時仲老積過我，會反過嚟話我。阿仔有學音樂，我試過幾次帶佢去琴行學打鼓，而我讀書時有夾過band，對結他有情意結，每次帶佢去，我就會去睇結他，跟住每次都買一隻結他走，阿仔睇唔過眼，叫我以後唔使帶佢去琴行，唔想我再買結他。」
滿足感勝賺大錢
Jeffrey用心經營，連「溥儀」旗艦店的裝修設計也親力親為，獲一致讚賞，更有不少外國人慕名參觀，他說：「你用心去付出獲認同，令人好有滿足感，比賺到錢滿足多一百萬倍，亦成為我好大動力！」他又解釋眼鏡店改名為「溥儀」的原因：「想有啲中國元素，而且圓形眼鏡，我哋一直叫溥儀眼鏡，佢又係皇帝，一定高級。」無論手錶或眼鏡行業，Jeffrey認為最重要的是服務質素及做好marketing，他說：「我鍾意做marketing，覺得錢賺得辛苦，要使得其所，值得嘅唔介意去做。」
採訪：Jessica Lam
攝影：黃叔榮