莫文蔚風雨交加 遭的士撞傷
莫文蔚（Karen）前晚在銅鑼灣過馬路時被的士撞倒，嚇得她以雙手撳實車頭，但仍被撞到跌地扭傷腳踝，照X光後幸沒有骨裂，Karen已出院回家休息，由於她沒大礙，決不追究的士司機，但叮囑所有司機要小心路面情況。
前晚9時許掛上三號風球，天氣惡劣兼下着滂沱大雨，當時Karen約了司機在銅鑼灣接她返家，怎知行到新寧道過馬路時，有輛的士急速駛至，Karen走避不及遭撞倒入院，幸沒大礙，經檢查及照X光後已出院返家休息，昨日她透過助手Joey回覆本報：「架的士撞埋嚟時，Karen即刻用雙手撳實車頭，之後成個人跌落地！」
照X光幸無骨裂
幸當時有兩位熱心途人目睹意外，立即用雨傘幫Karen遮風擋雨，還幫她致電報警，Karen的司機亦趕至送她入律敦治醫院，Joey說：「好在Karen只係扭親腳，照X光冇骨裂，冇乜大礙已經出院。」目前Karen忙於拍攝奇洛李維斯的新片《太極俠》，由於前晚打風取消，今日亦不用開工，明天（2日）才復工拍攝。
體諒司機不追究
不過，意外發生後的士司機卻賴Karen過馬路時掛住講手機，才造成今次意外，Joey為Karen呼冤說：「Karen話佢只係揸住手機，根本冇傾電話，不過佢亦都唔打算追究，佢體諒的士司機要搵食，唔想搞大件事影響人，不過佢叮囑所有駕駛人士，都要小心留意路面情況。」
文：音樂組