娟妹怨星媽：點解咁憎我？
羅慧娟一生經歷的戀愛不多，最為人津津樂道的，當然是與周星馳發展的一段長達三年的「地下情」。事過境遷，娟妹仍對當日星媽棒打鴛鴦耿耿於懷，並曾說：「我都想知道，佢點解咁憎我？」幸而最終她覓得真愛劉志敏，在她患病期間不離不棄，奈何仍未能白首偕老。
娟妹當年因拍《蓋世豪俠》，與拍檔周星馳發展成情侶，不過一直未有公開戀情，至92年分手後，她曾在訪問中表示：「我曾經講過，死都唔會承認同佢拍過拖，我唔知嗰3年係點過！」談到星媽，娟妹更直言：「我一向都感覺到佢對我有意見，我都想知道，佢點解咁憎我？」可見分手後二人再見不是朋友！
赴台散心展新戀情
導演高志森見證着這段情的熱戀期，他昨日接受訪問時，難免對昔日好友辭世大感失落：「當年我搵星爺拍《家有喜事》，咁啱我住喺娟妹樓下，星爺成日叫我上娟妹屋企傾劇本同度橋，娟妹可以話係第一個知道晒我哋條橋，同笑位嘅觀眾。喺我印象中，佢唔多加意見，絕對係個好好嘅聆聽者。（星媽唔鍾意娟妹？）人哋感情嘅嘢我唔加意見，總之嗰段日子大家走得好近，開完會我哋仲一齊去食龍蝦餐添。」
據知，星爺在熱戀期對娟妹的事情也相當上心，當年身在美國與李連杰合拍《龍在天涯》時，曾四出幫娟妹購買「大哥大」電話，為博紅顏一笑可謂用心良苦。
與星仔感情一筆勾銷後，娟妹到台灣散心，且結識了台灣影星李志奇，不過可惜異地戀難以維持，這段情一年後便告終。
友人聚會與夫邂逅
未幾娟妹在友人聚會上，碰上了新加坡證券董事劉志敏，雖然對方較她年長16載，但卻無礙二人的交往，08年更決定共諧連理，安心做少奶奶。婚後幾乎息影的娟妹對丈夫與前妻所生的兒子視如己出。而當她患病期間，劉志敏衣不解帶在床邊悉心照顧，無奈最終亦敵不過命運弄人，45歲的娟妹竟然「先行一步」，據知劉志敏前妻亦因癌病逝世，所以今次對劉志敏來說，打擊之大可想而知。
文：影視組