黃貫中爆朱茵 偷(目及)2年半

女神變港女

Paul報稱5呎7吋身高，窮得只有才華，英俊與否見仁見智，但他卻有本領追到擁有天使面孔、33B魔鬼身材的朱茵。Paul抱得美人歸，全靠一招「以退為進」，做人男友最緊要「捱得」，只要女友開心，他甘做花下泥。

「之前我都講過，一早嗒朱茵糖，但喺2年半鄰居生活中，我係眼尾都唔梢佢，皆因用鄰居嘅身份追佢，實太方便，唔可以凸顯誠意，所以我特登有咁遠搬咁遠，當我搬走咗，就變成另一個人，心諗：『唔係你鄰居啦，可以為所欲為啦，哈哈。』」

「拍咗拖後，阿茵有問番我，點解我當年一眼都冇望過佢，我同佢講，因為佢生得靚，由細畀人望到大，但我唔望佢時，就會覺得我好特別。阿茵仲自爆，佢由自己個窗望我個窗，足足𥄫咗2年半，只要我一開燈同爆機，就知我返咗屋企。仲有呀，有次我打電話畀佢話上嚟（朱茵住Paul樓上）還碟，佢就拿拿聲入房化妝、set頭，點知我交咗隻碟畀佢阿媽後就走咗，阿茵扮完靚出嚟唔見到我，話好嬲。」

「啲人封咗阿茵做『女神』，其實佢都好港女嘅，佢最鍾意買嘢，記得有次同佢去日本，我全身已經拎咗20幾個袋，跟住兩手fing fing嘅佢，我同佢話手指都拎到變白晒啦，點知佢講咗聲：『陰功囉。』就再勾多咗個膠袋落我手指尾度，之後仲話要立即去買手套畀我，咁就可以再買嘢，之後我學精咗，拖個篋陪佢行街，點知又畀佢買爆咗個篋，問佢點算，阿茵就話：『買多個篋咪得囉。』佢真係好犀利。」

曾放火燒屋

Paul年底榮升「老襯」兼星爸，曾誓神劈願話：「我唔會生B」，全因怕BB盡得其「真傳」，曳到如「哪吒托世」，想起童年時的「惡搞事」，Paul大嘆日後「有排受」。

「我咁怕有下一代，係因為我細個時真係好Q曳囉，第一日返幼稚園時，已經掀女同學裙底，搞到老師見家長，到讀小學時，我仲厲害，特登喺課室放田雞，嚇到全班女同學通處跳，條裙飛起晒，唔使用力掀都有嘢睇。」

「又試過畀阿爸困喺房唔畀出街，因為我約咗個friend，所以由11樓擒窗落樓，又試過將隔籬師奶啲信拆晒，畫完龜再入番信封，點知師奶同我阿爸投訴打咗我一鑊，我梗係懷恨在心，咪放火燒佢間屋。」

火爆和事老

Paul性格火爆，勢兇夾惡，但他在Beyond四子的日子裏，自言是「勸交」的和平使者，反而主音黃家駒及其胞弟黃家強卻是經常炒大鑊的滋事分子，當家駒兄弟嗌得最激時，Paul都係講一句：「你哋咪×嘈，一人少句啦。」

「我樣衰嘛，表面上我係最×寸，最×煩嗰個，但Beyond四個中，只有家駒同家強成日嘈交，有時嘈得太勁，我咪做和事老，勸佢哋咪×嘈，至於我哋四個有冇爭女？我自己就冇囉，人哋就唔好講呢，可能爭女係每隊band仔必經階段啦，不過我就覺得有乜女值得去爭，成班仔爭一條女咁肉酸。」

後記

阿Paul雖然火爆，但能夠洞悉女人心，深明天下女人皆記仇，所以Paul話同女友講嘢，最忌衝口而出，隨即如潑婦上身扮發難：「你呀，你邊年邊月邊日，話我乜乜乜呀，我記得㗎，你唔好唔認啦……」朱茵，Paul唔係講你，千祈唔好對號入座，秋後算帳。

文：音樂組

場地：the whiskey priest@蘭桂坊

服裝：MISTER FREEDOM@WDSG

髮型：Matthew Kong@headquater

化妝：Jonathan Li @Mod Makeup Academy