湯洛雯舞唔掂 怕王晶關注
十四位港姐昨日進行舞蹈比賽，之前與李渼琦被傳不和的湯洛雯，昨日突然翹手扮老友，更指根本從來沒有嗌過交。而日前被王晶大踩唔掂的湯洛雯，自知舞技麻麻，坦言不想王晶留意她跳舞。
《2012香港小姐競選》十四位候選佳麗昨日於電視廣播城排舞並進行一對一比賽，當中卞曉帆扭腰又扭籮、張鈞美則一字馬，林泳淘則「蒲精」上身跳得相當奔放，而李渼琦則跳到連舞步都記不起。
多謝阿叻讚美
湯洛雯表現只一般，坦言沒有底子的她，表示平時沒有落Disco蒲。說到陳百祥（阿叻）撐她，更與王晶罵戰，她坦言有聽過，卻沒有看過新聞，說到王晶指一班女仔中都認不到她時，她謂：「每個人審美眼光唔同，實有人覺得你靚同唔靚，都唔係第一次聽，唔會唔開心。」她表示多謝阿叻讚美，問想不想王晶留意她時，她謂：「都想留意自己優點，會盡量表現，不過跳舞一定唔係。」
湯洛雯之前被指與李渼琦不和，昨日訪問時二人忽然翹手，湯洛雯說：「不嬲冇話嗌交，佢話冇講過話我蝦佢，睇到新聞佢有唔開心，我有主動同佢傾番偈，之前真係有丟毛巾落佢張床度，都say咗sorry！」而李渼琦被問到是否原諒了對方時，她謂：「nothing to forgive ，it's ok！」
林泳淘辣傷腳
此外，李渼琦明顯不記得舞步，她表示家中練習時表弟覺得好玩，都跟她一起跳，她笑言：「唔記得唔緊要，free style自己諗囉！好過企喺度唔郁。」而林泳淘表示跳時腦袋一片空白，又否認落開Disco蒲，平時熟朋友生日先會去，去到只會飲一兩杯。見她大髀上有疤痕，她指給電髮夾「辣」親，她說：「之前四日有水泡，尋日開始消水，初時好擔心，打畀朋友話將來實冇人要，我隻腳已經好多疤，希望快啲好番，等佢甩咗焦睇吓點先。」
港姐大起底
爆料熱線：3600 1022
爆料傳真：3600 1000
爆料email： entertainment@opg.com.hk
文：影視組