劉美君轟TVB做「翻版」
歌手劉美君昨日接受查小欣訪問，透露正忙於宣傳7月頭推出的廣東碟。身為環球歌手的她，因唱片公司和無綫關係再度惡化而未能亮相無綫，她直說：「唔覺得對我有影響喎，亮相無綫又唔會令張碟特別好賣，之前我幫無綫做《超級巨聲》評判時，咁啱出國語碟，我諗住同無綫互相幫助啦，點知一首歌都plug唔到。」
劉美君又謂支持環球跟無綫抗衡，指唱片公司都是維護歌手利益，又炮轟無綫：「我哋幫無綫做騷，佢哋將啲片製作成DVD賣埠，但我哋又冇錢分，無綫同（做）翻版有乜分別。」問她此言一出可擔心遭無綫「一世封殺」？她無懼說：「我同now、城市電訊、有線（電視台）合作得好開心，當我哋係人。」又指她的言論是「為人民請命」。無綫製作部總監余詠珊稱不作回應。