劉浩龍四面楚歌 谷爆自殘
劉浩龍（師兄）單方面宣布「龍兒戀」，雖成功谷掂人氣，但卻遭連番插爆，就連祖兒老闆楊受成亦直斥他「好笨」兼「鹵莽」！一波未平、一波又起，曾在微博暗示遭師兄出賣的何韻詩今日將現身澳門，令已腹背受敵的師兄百上加斤，難怪昨日拍攝新劇時心神恍惚，壓力爆煲，更撻落石屎地自殘兼狂射龍門洩憤。
日前單方面宣布「龍兒戀」的師兄，雖成功蛻變成話題人物，卻惹來連番插爆，先有扮大牌推劉心悠淋雨後又被指借戀情上位，加上事件女主角容祖兒日前親述戀情只處於初步階段，而向來低調的祖兒老闆楊受成前日又開腔直指師兄「好笨」兼「鹵莽」，自食其果的師兄可謂腹背受敵。
不過師兄的噩夢並未因此結束，一直被指亦自覺是「龍兒戀」受害者的何韻詩今日將現身澳門出席活動。由於阿詩之前曾在微博暗示遭師兄出賣，及被最能信任的人「一刀直插心臟」，又聯同菇爹及菇母（何韻詩父母）取消微博關注，實行「滅絕師兄」，深怕被愈揭愈臭的師兄唔驚就假！
狂撻落石屎地
顧忌多多的師兄昨日現身新蒲崗為城電新劇《第二人生》拍攝踢足球場口時明顯心神恍惚，等候埋位期間罕見笑容，不是「盯着」足球發呆，就是狂射龍門洩憤，表現躁爆！而拍攝一場遭波友踢跌的戲份時，師兄更假戲真做不斷使勁撻落石屎地自殘，前前後後撻足五、六次，行徑令人側目。當發現有記者採訪時，師兄即故作輕鬆與工作人員吹水，期間又不時拿起手機狂撳，表現極不專心。
未知是否之前因出席公開活動時拒絕受訪遭插爆，師兄昨一改「生人勿近」姿態，強顏歡笑兩度接受記者訪問！問到連環撻地會否感辛苦？他表示：「唔辛苦，拍戲都係咁。」之後記者即單刀直入問他知否與祖兒的蘇梅島之旅曝光，師兄聞言變色謂：「我呢排淨睇劇本，其他嘢都冇睇。」未知是否怕講多錯多，師兄語畢即會合工作人員作「掩護」，表現驚青。
不談負面評價
之後記者再伺機問他對楊生負面評價的看法，師兄木口木面謂：「今日唔講呢啲嘢喇，都想專心拍劇，嚟緊三個月都會好專注拍劇，應該唔會點出席公開場合。」問到是否只想努力工作？師兄笑謂：「係啦！」似乎一心想要為追趕祖兒發力。
文：影視組