嘉玲一卡寄情 賀偉仔50歲

梁朝偉今日50歲生日，每年牛一亦盡量與老婆劉嘉玲雙雙慶祝的他，雖然今天要於外地拍攝新片，但向來愛錫老公的嘉玲日前已為壽星仔做足準備，專誠前往選購生日卡冧偉仔。

當日戴上黑超的嘉玲，於下午四時許，在助手陪同下前往了中環，兩人下車後便步往附近的商場，嘉玲更表現心急步入了該處一間書店，她甫入店便往賀卡專櫃揀選心頭好，期間嘉玲拿着數款生日卡與助手研究時，還除低黑超細心逐張挑選。

偉仔在銅鑼灣晚膳後，離開時笑笑口跟記者道別。

嘉玲往賀卡專櫃，逐張揀選心頭好。

不過，眼利的嘉玲不久便發現記者在場，她與助手傾了幾句後，兩人便匆匆離開。嘉玲步出門口時，被記者追問如何與偉仔慶祝生日？她則笑笑口未有回答，繼而與助手步往乘的士走人。

忙還飯債心情靚

至於偉仔早前難得留在香港休息，即頻頻與友人飯局敍舊兼預祝生日，可見他人緣甚佳。日前晚上，偉仔以斯文打扮與數名男友人前往銅鑼灣晚膳，逗留至11時許才離開。偉仔步出時飲到面紅紅，心情大靚，見記者拍照亦笑容滿臉揮手道別。

相隔數天，偉仔再度出動，並相約兩名女友人往九龍區的酒店晚膳，當晚戴上鴨舌帽的偉仔，還穿上橙色風褸，極為搶眼！難怪他步出酒店時吸引不少途人目光，偉仔見狀匆匆付了貼士給泊車員後，便親自駕車接載兩名女友人返歸，盡顯風度。

文、攝：追蹤組