師兄「Joey」如膠似漆
知名度幾級跳的劉浩龍（師兄），昨午在四名助手陪同下拍新劇《第二人生》，並回應「龍兒戀」。他先為日前被指為避傳媒而推劉心悠出外淋雨而鞠躬耍冧，但未幾回復寸嘴，他說：「佢（Joey）講過一次，我唔講啦，我依家首要拍好個劇。（Joey認咗，你玩封口？）講工作啦！（努力工作拉近同Joey距離？）我係同自己有距離，想把握機會追番。」問到是否與Joey感情穩定？他即拉着身旁同樣英文名叫「Joey」的鄧建明做擋箭牌說：「問我哋感情點喎？」鄧建明笑說：「如膠似漆！」
唔認扮大哥
再問與何韻詩關係如何？師兄說：「永遠好朋友。（佢避走台灣療情傷？）唔知！（你喺微博向佢求過婚？）微博不必太認真。（鍾意Joey係咪認真？）多謝各位，畀我專心拍劇吖！（MV導演Heison暗指你撬牆腳。）冇睇報道，答唔到。（Joey叫你低調？）我依家都好低調。（但你高調宣布戀情！）咁我依家高調宣布我拍緊劇，你記住寫。（有指你戀上天后即扮大哥？）一睇就知我唔係。（話你扮呀！）識我嘅朋友知我係點，總之我再同大家講聲唔好意思。」
至傍晚，師兄拍完劇收工，提到楊受成指他自爆戀情很笨，他強顏對記者說：「辛苦晒，我返屋企啦，聽日見！」然後急步登上友人車輛，遊了幾轉花園，試圖撇甩記者不果後，才返抵大坑寓所。