楊受成擔心祖兒 嫌劉浩龍笨
一手打造容祖兒成為樂壇天后的英皇老闆楊受成，對於愛將跟劉浩龍暗譜「龍兒戀」，被形容為女尊男卑，劉浩龍高調宣布戀事，繼被女友祖兒寸「佢講夠啩」，楊生亦直指他「笨」，處事鹵莽，更先後以「希望對方真係鍾意佢（祖兒）」及「冇其他目的」而表現憂心。
集英皇萬千寵愛在一身的祖兒，被老闆楊生視為掌上明珠，對她超級愛錫。連日來祖兒跟劉浩龍的「龍兒戀」鬧得全城沸騰，楊生昨日在灣仔公司大樓兩度乘車外出及折返，在第二次外出時，楊生有禮地校低車窗跟在場記者傾了兩句。問是否贊成龍兒戀？他微笑說：「佢（祖兒）搵到鍾意嘅咪得囉！（支唔支持佢哋？）佢鍾意，我鍾意。」但當問到兩人是否合襯時，楊生即校高車窗未有回答離去。
至下午五時，楊生再度折返，在三名保鏢護送下，由正門走到側門上樓。期間楊生應邀大方企定定受訪，全程笑容可掬的他有問必答。以下是記者跟楊生的對答內容。
不認識劉浩龍
記：外界覺得劉浩龍嘅身份、地位同祖兒唔配！
楊：感情嘅事唔應該分等級、財富。
記：你接受到佢哋拍拖？
楊：最緊要係祖兒開唔開心，以及對方係咪真心鍾意佢，亦都係咪真係對佢好！我哋開心，錫佢嘅人開心，佢啲歌迷又開心！
記：祖兒有冇同你交代拍拖事件？
楊：我諗唔需要啦！咁大個女，使咩呀！希望佢開心，希望對方真係鍾意佢，冇其他目的。
記：你咁講係咪真係有擔心祖兒同有疑問？
楊：我哋咁錫佢，梗係會擔心佢！我哋只希望容祖兒本人，搵到真正嘅伴侶，真正錫佢嘅人。
記：楊生，你對劉浩龍印象點？
楊：我唔識佢。
記：佢入行15年喎！
楊：我同佢冇乜交往。
記：將來佢哋拍拖，你咪成日見面？
楊：（開懷大笑）唔知呀！
記：你恨唔恨祖兒拖劉浩龍見你？
楊：呢個係睇祖兒本人，我邊有資格講。
記：你係老闆可以提議！
楊：你老闆可唔可以命令你做咩吖？
記：你唔管佢（祖兒）o架嗱？
楊：咁大個女，講真十年前會畀意見，今日唔會。
記：送佢哋祝福？
楊：希望佢開心，佢搵到鍾意嘅嘢囉！同埋希望對方真心對佢好，唔係話有其他目的。
珍惜不應早講
正當在場傳媒以為訪問要結束時，楊生再主動開口……
楊：查實對方（指劉浩龍）都好笨，咁早件事都未穩健、未成熟就講出嚟，好笨囉！
記：覺得佢借祖兒宣傳？
楊：（即收起笑容）咁呢個我唔敢講，佢有咩目的我唔敢講，只覺得佢笨。
記：覺得浩龍公開戀情太高調？
楊：如果佢珍惜開始呢個階段，係唔應該咁早講！如果佢珍惜嘅，我覺得佢有少少鹵莽！
說罷後楊生就轉身上樓，直至晚上七時多才離開，但就未有再受訪，他說：「唔講啦，講咗。」
祖兒有覺好瞓
承認正跟師兄處於發展階段的祖兒，昨日中午由寓所乘保母車返公司開會。薄施脂粉的她身穿薄恤衫，配襯一條搶眼的螢光粉紅leggings及粉紅色手袋，認真襯到絕，心情應該不錯。問睡得可好？她說：「瞓到！」再問她可有致電劉浩龍？她未有回應就直接入𨋢。「龍兒戀」驚爆後，兩人的知己好友何韻詩一直未有露面，雖然已秘密返港，但昨日繼續足不出戶。
文：音樂組