歐陽德勛娶蔡立兒 老友陪喊
歌手歐陽德勛和蔡立兒結束16年愛情長跑，昨日拉埋天窗，並組星級兄弟姊妹團助陣，新郎德勛在宣讀誓詞時激動落淚，令現場親友感動眼濕濕，大晒甜蜜的一對新人則揚言有共識婚後努力「造人」！
一對新人昨午3時於新蒲崗國際城市教會舉行婚禮，新娘蔡立兒穿上白色的復古式婚紗，身形略顯圓潤，昨日共12男12女兄弟姊妹團，當中包括BIG FOUR和吳國敬，姊妹團則有張衞健太太張茜、梁漢文太太Karen、黎芷珊、梁雨恩及吳國敬女友Elaine等；周慧敏、陳奐仁夫婦和李國祥等則到場觀禮。婚禮以基督教儀式進行，晚上則移師到尖沙咀舉行婚宴。張衞健表示跟兩人由細玩到大，戥兩人結婚開心，阿敬則大爆德勛讀誓詞時早過新娘子落淚，自言亦被感動到流下兩滴眼淚。
有共識結婚後造人
之後德勛和蔡立兒約傍晚6時到達婚宴場地打點，兩人徇眾要求甜蜜「咀嘴」，直到個多小時後，兩人進行切餅儀式並再次「咀嘴」，任傳媒拍照，表現大方。至於新娘子是否「雙喜臨門」？她即答：「唔係，我哋有共識結咗婚先有BB。（努力造人？）順其自然啦。」德勛稱因太太之前貧血和甲狀腺有事剛痊愈。
阿詩疑怕追訪避席
昨晚的賓客名單中原本有何韻詩，未知是否怕被傳媒追問「龍兒戀」及與鄧九雲的戀情而缺席。問到BIG FOUR可有玩一對新人？四子表示：「冇玩，今日出席一個好莊嚴嘅婚禮，都好多人感動到喊。」此外，林子祥、鍾鎮濤、盧海鵬、雷頌德夫婦、杜德偉、官恩娜、賈曉晨、歐陽震華夫婦及萬梓良等多位圈中人畀足面到賀，而杜德偉承認計劃兩年內與女友結婚。
文：音樂組