羅力威亞視出身被飛《紅白》

有指英皇歌星羅力威原本有份為無綫《2012翡翠歌星紅白鬥》演出，但因無綫非戲劇製作總監余詠珊上場後，令老公星煥高層何哲圖旗下藝人曝光率大增，此舉令英皇感不滿。有人認為是英皇放料，故取消羅力威演出。余詠珊昨日在記招回應：「早期係有呢個提議，但係我唔贊成羅力威嘅擺位，好似變咗係亞視代表咁！我唔介意佢喺節目出現，但係介意佢用呢個形象出現，咁使唔使請埋亞視高層嚟剪綵呢？」至於英皇高層霍汶希則謂：「只係得我會放料，吳雨都唔會同記者聯絡。樂壇咁大，唔會因為家庭背景影響合作，我相信余詠珊係公正嘅人。」霍汶希和余詠珊在記招後握手粉碎不和傳聞。