鍾舒漫 送上門餵飽Steven
鍾舒漫（Sherman）盛傳被前男友張致恒（Steven）翻撻成功，據知她被對方的真誠感動，兩人靜靜雞玩復合！日前Sherman更送外賣上畫室餵飽男友，借畫畫為名攞正牌密會，瞞住公司玩地下情！
Sherman和Steven因同是英皇歌手朝夕相對而撻着，2008年被踢爆在公屋同居，不過當時年少輕狂的Steven愛玩多過工作，結果分手收場。直至近年男方終於開竅全情投入工作，與關智斌重組BOYZ再闖樂壇，又與友人合資開畫室，明顯生性很多。
食嘢識抹嘴
據知，Steven雖與Sherman分手多年，但還是覺得她最好，洗心革面後的他作出箍煲行動，終用誠意打動了Sherman。消息指兩人已靜雞雞翻撻，早前便傳出Steven透過instagram向Sherman求婚，惟兩人矢口否認。不過，日前本報拍得Sherman送外賣上Steven畫室，兩人愛火重燃斷正。
當日戴帽打扮低調的Sherman，現身Steven位於新蒲崗工廠區畫室的樓下買外賣，只見她買了燒賣、菜飯、炒麵、飲品等大袋食物，甘做外賣妹慰男友，Steven亦親自開門迎接Sherman。兩人坐埋一角慢慢食，Sherman見男友食到滿口油膩，即體貼地遞上紙巾，果然是100分女友。
教女友畫畫
之後Sherman穿上圍裙化身老闆娘，在畫室整理畫筆、顏料，並趁機繪畫大作。由於Sherman將舉行畫展，故近日頻頻埋首繪畫，Steven亦盡男友責任從旁給予意見，並叫拍檔指點女友。Sherman離開時，聽到她對Steven說：「攞番妹妹（鍾舒祺）畫嘅畫畀我帶返屋企啦！」然後Steven搬卡通畫像親送女友搭升降機離開。
文：音樂組