徐靖雯向劉翔埋身
近期的歐國盃對男士們來說一定是盛典，但女士們可能會視之為一場災難，總之盛典定義人人各有不同。不過，08年北京奧運就成為明星心目中的盛典典範，同樣受鄭融、琦琦、徐靖雯及朱凱婷推崇！
徐靖雯
「我覺得係08年北京奧運，因為喺自己祖國舉行，而且當年我有份做義工，可以同世界頂級運動員近距離接觸，我仲同劉翔合照。」
陳美詩
「盛典？梗係我細佬嘅婚禮，因為當日由我做司儀，同埋睇住佢成家立室，當時真係好感動，搞到我眼濕濕。」
鍾蕙芝（Lavina）
「一定係我五歲時候嘅生日會，因為當時家庭環境唔好，爸爸喺我兩歲時就過身，喺窮困嘅環境下，媽媽婆婆都幫我開生日會，呢個成為我心目中嘅盛典。」
王璐瑤（Lu Lu）
「我會揀演藝學院嘅畢業表演，因為我係其中一位演員，經過嗰次嘅表演之後，令我肯定自己鍾意演戲，發掘咗呢方面興趣，對我嚟講好有意義，係大盛典。」
朱凱婷
「我最難忘嘅盛典係08北京奧運，嗰年係自己第一次代表ｔｖｂ去奧運做主持，訪問好多出色嘅運動員，例如郭晶晶。同埋每年嘅大型煙花匯演，自己都好好彩可以擔任司儀，每次都係喺最靚嘅位置睇煙花！」
陳煒
「我最難忘嘅盛典梗係96年嘅亞姐選舉啦，嗰年係自己第一次參加咁大型嘅公開活動，自己有份參與之餘，仲得到獎項，改變咗我一生，絕對係畢生難忘！」
琦琦
「08年北京奧運，尤其開幕好震撼，當時我同老公喺現場欣賞，中國首次辦奧運，真係好感動，引以為傲。」
鄭融
「08年北京奧運，當年我喺屋企睇開幕同閉幕，因為喺自己國家搞，全世界嘅人都睇緊，身為中國人感到驕傲，覺得好威、好有歷史性。」
吳若希
「08北京奧運，因為無論中國香港都付出好多，香港為馬術比賽興建咗場館，好值得中國人驕傲。」
許廷鏗
「我覺得香港回歸係盛典，當時我好細，記得全家喺屋企睇電視，見到爹哋愈睇愈激動，仲眼濕濕，覺得係好認真，好重要嘅時刻。」