宮雪花亂咁嗡 無綫法律追究
【鄺蔚霆北京直擊】亞視趁55周年遠赴北京搞台慶，雖然勞師動眾，可惜節目極悶兼極娘，幸好有女藝員「胸」群而出挽回「收視」。昨晚後生派較出色的有許瑩、劉曉智、筱靖、韓燕及張家瑩，可惜都不及成熟派有睇頭，黎燕珊、魏秋樺、羅霖、黎虹讌均意外地齊齊敲響警鐘胸，幸好筱靖穿上背面低開至屁股的晚裝，為後生派贏回漂亮一仗。而同場的還有馮寶寶母子及徐小鳳。
亞視台慶重提瘀事
繼續頭戴誇張頭飾亮相的宮雪花，早前接受訪問時自爆當年無綫透過中間人白韻琹以一百萬利誘她在亞姐決賽玩失蹤，旋即辣慶無綫，外事部副總監曾醒明直斥傳聞匪夷所思：「如果咁低檔，一定會畀人揭穿，亦非大台作風。我哋好有興趣知消息來源，同邊個可以代表無綫開呢張支票。」直指事態嚴重的曾醒明，揚言不排除會採取進一步法律行動。白亦力指花姐大話連篇：「其實當年方逸華旗下電影公司想搵佢做風塵女子，份合約一百萬。因為其中一部趕住開，咁啱撞正亞姐，所以接咗就參加唔到喇。」她更指若無綫告花姐可挺身作證。
花姐得悉無綫有意採取法律行動後，即反口指從未提及中間人名字，並辯稱是誤會：「張支票係無綫高層畀某律師樓叫我退選嘅，搵我拍電影嘅係中間人，可能我同中間人有誤解。其實咁大個台有咩好告啫，我有我講，佢有佢講，咁真有其事嘛。」
台慶歌唱環節播了不少ATV經典鏡頭，當中連「衰咗」的片段也播，出現亞視高層盛品儒為誤報江澤民死訊而鞠躬道歉的畫面。
