盧巧音下月再唱：我仲未死！
憑一曲《好心分手》唱得街知巷聞的盧巧音日前獲《娛樂onShow》邀請擔任嘉賓，大講近年退居幕後的感受和得着，而她亦即將於下月重踏舞台，更揚言：「我仲唱緊歌！我仲未死！」
近年轉戰幕後的盧巧音（Candy）獲邀來到《娛樂onShow》，接受主持周吉佩訪問。Candy表示下月即將舉行小型演唱會，並坦言：「希望趁機會可以做番啲嘢，向歌迷交代，我要話畀佢哋聽我仲唱緊歌，我仲未死o架！」
發放更多愛能量
Candy又透露音樂會的主題叫《Nuri》，分別代表圖、鸚鵡和光，正因以前唱得太多慘歌，所以希望歌路可轉型，憑藉音樂會發放更多愛的能量！主持人問她會否作性感演出？Candy一聽即耍手擰頭說：「嗰個時間都過咗，要谷胸或者點樣都做過，所以唔打算性感，只係諗住以歌會友。」
代表作唱到想嘔
要數Candy的代表作，不得不提《好心分手》，不過Candy亦自爆曾因唱此曲唱得太多而搞得自己「想嘔」，她說：「首歌係好好，但問題係唱得太多同膩咗，試過唱到個腦空白，有兩句唔記得咗！」最後Candy亦坦言以前唱得太多悲傷的歌，加上年紀漸長，心態有所轉變，故希望日後可製作更多開心的歌。
文：專案組