李亞男阮兆祥 見面即開餐
前華姐冠軍李亞男（Leanne）早前與男友王祖藍的好友阮兆祥合作無綫新劇，Leanne笑言每次見到祥仔，雙方打完招呼後的例牌對白必然是：「陣間食咩？」認真心有靈犀。
李亞男最近獲無綫賞識，在新劇《衝吧！瘦薪一族》中飾演女主角，並與男友的好友阮兆祥大搞「火花」。由於Leanne與祥仔十分稔熟，她笑指每次看到對方都有「想笑」的感覺，問到與這位熟朋友拍親熱戲有否NG連連時？Leanne即說：「佢喺劇裏面追唔到我，所以無咩親熱場面。」
大讚祥仔愛助人
雖然看似向祥仔派檸檬，但Leanne其實很欣賞對方，除大讚祥仔愛幫助人外，她更自爆與祥仔心有靈犀：「我哋每日開工，打完招呼第二句都係：『陣間食咩？』最記得有日朝頭早喺九龍城開工，我忽發奇想問祥師兄打唔打邊爐，佢聽完後嚇咗一跳話：『依家朝早咋喎？下晝都難搵啦，何況晨早！』之後佢就車咗我去一間好出名嘅食店度食牛雜，算係滿足咗我為食嘅需要。」
中文差唔明扮明
過往多飾演攻心計、任性或是有錢女的Leanne，笑言在新劇終可做回自己：「不過係以前嘅自己，呢個角色好熱心幫人、好斯文同含蓄。但我依家無以前咁斯文，又爛gag咗，所以都要刻意諗番以前嘅自己到底係點。」Leanne笑言回想初入行的自己，最大缺點是偶爾會「唔明扮明」：「有時同成班人傾偈，因為我廣東話唔係咁好，有時可能會lost咗，但為咗融入個圈子，我會笑住點頭扮明，咁唔係幾好。好彩後尾有個朋友提醒我，話每個人喺唔同嘅圈子裏都會有唔同嘅性格，我只要做番自己就得，我先放鬆番啲咋。」
採訪：影視組
場地：Misto restaurant