陳慧琳好飾 HotCha浴念強
天后陳慧琳（Kelly）、女子組合HotCha、張繼聰、張致恒等偶像歌手，早前齊踩過界玩室內設計，Kelly的房間以300件裝飾凸顯非凡品味，HotCha房的賣點是露天鴛鴦浴缸，而阿聰就得太太謝安琪為他擔任軍師。
為慶祝都會海逸酒店10周年，大會請得10個不同單位的歌手，包括Kelly、鄭融、HotCha、阿聰、張致恒（Steven）、羅力威、泳兒、RubberBand等設計主題房間。Kelly每半年就會更換寓所擺設，故首度跟酒店合作，正好讓她發揮所長，她說：「我間海景套房花咗超過一星期構思同布置，用咗300件裝飾擺設，我仲會將部分收入撥捐畀自己嘅助學基金做善事。」
鴛鴦戲水冇問題
HotCha的主題房命名為「色彩假期」，除全房布置色彩繽紛外，最大特色是露台擺放了大木桶，成員Winkie說：「住客可享受露天浸浴，雖然個木桶細啲，但情侶唔怕逼，可以一齊浸落去，我哋仲專登揀咗中性香味嘅沐浴露，方便玩泡泡浴。」
阿聰的房間則叫「“HIP”tel」，他說：「我老婆（謝安琪）好叻室內設計，我哋屋企都係佢諗出嚟，所以有向佢取經。」見阿聰將一幅紐約夜景的油畫放在床頭，他就話：「我揀呢幅畫係因為我間睡房望出去就睇到維港全景，住客睇到咁靚嘅夜景，再睇吓幅畫，就好容易幻想到自己身處紐約。」
文：音樂組