王梓軒為莫文蔚做衰仔
唱作歌手王梓軒（Jonathan）將於8月舉行處男騷，好友莫文蔚（Karen）擔任星級顧問，在王梓軒的芸芸作品中親自幫他挑選個唱主題曲，怎知她揀中的demo早已交了給張敬軒，王梓軒惟有出彈弓手厚着臉皮問軒仔攞番。
王梓軒將於8月假會展舉行演唱會，請了星級班底助陣，包括音樂總監趙增熹、星級顧問Karen，跟他相識多年的老友Karen還介紹設計師Johanna Ho為他打造戰衣，令王梓軒感激不已，他說：「Karen呢排雖然好忙，但佢都抽時間同我哋開會，畀咗好多意見，連演唱會主題曲《Your Song》都係佢幫我揀。」
揀中《Your Song》
當日Karen問他主題曲搞成怎樣？王梓軒便將自己寫好的多首歌曲demo播給Karen聽，他說：「Karen一聽到《Your Song》就話呢首，不過我已經將首歌畀咗張敬軒，惟有厚住面皮同軒仔講，好在軒仔好好人話『算啦，見係你，你有需要嘅話，彈弓手都OK』，真係好感謝佢！」
全男班怕惹誤會
解決了主題曲後，王梓軒便積極投入個唱備戰，他透露會跟趙增熹表演合奏，由趙增熹彈琴，他就拉小提琴，主修現代舞的他當然會在個唱上大顯身手：「我亦會跳舞，仲會融合武術，詠春、洪拳、劈掛。（有冇辣身舞？）初時排舞老師話全部dancers都係男仔會型啲，就係怕誤會先加兩個靚女dancers，我哋肯定會有性感嘢，自己都要做準備工夫練腹肌，等人哋摸落去唔好有肚腩，哈哈！」
採訪：音樂組
攝影：沈健程
場地：The Mira