陳偉霆獲撐：媽咪堅型！

我係屋企孻仔，家姐大我10幾年，阿哥都大我11年，媽咪今年已經60幾歲，但我哋成家人冇代溝，媽咪同家姐係我生命中最重要女人，無論我喺出面有幾多負面報道，佢哋都處理得相當輕鬆。每當我遇到唔開心，甚至頂唔順嘅關頭，就會搵阿媽傾偈，而我阿媽就會話：「你咪鬼理（負面報道）啦，你唔係咁白癡嘛！」然後就自己繼續睇電視。

家人鼓勵變大隻

啱啱入行時，試過伸手問阿媽攞錢，一千幾百梗有，其實入行時我有做迪士尼主持，都有錢賺，仲頂得住。同埋家人好支持我入行，17歲嗰時工作量唔算多，而且身形好瘦，為咗變大隻啲，試過日食12隻蛋白，早午餐都食含豐富蛋白質嘅嘢，加上每日做一、兩小時Gym，半年已經有效，確係大隻咗！估唔到自己堅持可以咁多年，其實真係要多得家人不斷鼓勵同引導，我阿哥仲逼我做Gym去鍛煉意志！

William每逢唔開心 ，都會搵媽咪傾心事。

阿Sa

避談太多感情事

幾時（同阿Sa）結婚？我依家避談感情事，以前追女仔都係自己主動出擊，係有飛來蜢，但冇成功拍過拖，最緊要保持距離，呢個係最直接同簡單方法，總之啲女友係我一手一腳追番嚟。

之前講得太多感情事，我明白有啲話題同新聞會牽涉到，但依家答案都係唔講，就算有傳媒要話我，我都只可以講句對唔住，因為我要維護事業，之前要交代嘅上年都交代晒；依家衍生出嚟嘅問題，已經係超出我自己想話畀大家知嘅嘢，呢一刻要停講感情事，唔關公司事，純粹自己諗法。（完）

後記

眼前的陳偉霆由昔日的年輕小伙子，漸變為成熟型男；由以往的「瘦骨仙」身形，演變成今天的「大隻男」。過程雖然辛苦，惟他仍堅持到底，目標明確！而他入行後雖然是非纏身，幸他EQ甚高，加上獲同事、女友、家人等支持，所有難關也一一捱過，似乎注定食娛樂圈這行飯呢！

口述：陳偉霆

筆錄：專案組