李嘉欣驚喜生日 速切8粒瘤
前日剛度過了42歲生日的大美人李嘉欣，昨日出席活動時自爆早前做身體檢查發現腸和胃有八粒良性瘤，為免這些瘤將來有甚麼變化，即時進行切除手術。嘉欣年前佗B時亦曾入院做手術，現在又切除八粒瘤，難怪她的生日願望就是身體健康！
李嘉欣昨日以特別嘉賓身份出席首飾品牌活動，較前明顯消瘦了一點的嘉欣，穿起白色吊帶裙時，上圍亦見有點鬆動。剛於前日（20日）生日的嘉欣，跟老公許晉亨及老爺、奶奶出外吃飯慶祝，至於囝囝Jayden Max（JM）因睡了沒有同行。
嘉欣生日，小JM有甚麼表示？她說：「冇表示，有錫啖我，佢都係繼續恰我囉！我喺度時佢就會特別扭計，我同佢返playgroup畀佢老師喝我，話我唔喺度佢就可以乖乖哋跟住學晒啲嘢，老師叫我坐埋一邊唔好畀JM見到。」
老公功勞大
至於老公許晉亨則送了一份大禮給她，嘉欣說：「佢送咗個健康檢查畀我，我今年有好多小病小痛，老公之前做咗個身體檢查，佢知我好驚，就搵埋醫生幫我做個超詳盡嘅身體檢查，仲照埋內窺鏡，係一份好大嘅禮物。」
由於做內窺鏡時發現有八粒良性瘤，於是即時做手術去除後患，她說：「照內窺鏡時發現嘅，係喺腸同胃度，當時一發現就即刻切除咗，今個月做嘅。（係咪微創？）都算係，雖然係良性，但唔知將來會有咩變化，愈早切除愈好，令我清除疑慮，我係個好諱疾忌醫嘅人，今次老公好大功勞！」
否認曾小產
其實2010年時，嘉欣佗着小JM時，便曾經秘密入院做了一個小手術，當時她沒有說明病情，僅在微博上載一張吊鹽水的照片，誠如嘉欣所言多小病小痛，故昨日提到生日願望時，嘉欣毫不猶豫地說：「除咗健康都冇咩願望！」
目前嘉欣暫不考慮再生小朋友，指小JM有很多小朋友仔，還有表哥作伴，不擔心他會悶，對於早前有報道傳她小產一事，嘉欣否認其事：「冇啲咁嘅事，大吉利是！（畀人咁傳會唔會唔開心？）唔會，當新聞一則，唔會太介意。」
文：名人組