Annie G.嗒兩杯 浪漫「球」愛
金金哋頭髮Annie G.，實情是名中國同西班牙的混血兒，睇好西班牙成功衞冕的她，為增加睇波的氣氛，特別彈條好橋畀一眾「姊妹」，就係準備定心儀對象喜歡的球隊戰衣，一人一件，飲住酒邊睇波邊借衫浪漫傳情。
明明有一半西班牙血統，Annie G.竟然撐烏克蘭，唔通女仔都係手指拗出唔拗入？Annie G.話唔係唔支持「鬥牛國」，只係希望大家視野廣闊啲啫：「係人都知西班牙勁，唔使專登支持，球壇有唔同球隊，一枝獨大其實唔係咁健康，烏克蘭呢類東歐國家，踢波都好好睇o架，一樣唔可以錯過。」依家做埋主持嘅Annie G.果然口才了得，成個足球名家咁款。
烏克蘭似伏特加夠勁
Annie G.依家除咗Model工作，好多時都會落夜場做DJ打碟，佢就用酒嚟打譬如：「伏特加夠勁、夠刺激，就好似烏克蘭踢波風格，西班牙紅酒亦好飲，配火腿好味，兩樣嘢可以共存，冇衝突o架。」
印埋名字加料冧男仔
歐洲國家盃期間當然唔單止飲酒，要睇波有氣氛，買番件波衫就最好喇，Annie G.話姊妹可以趁機向心儀對象暗示：「查清楚對方鍾意邊隊，買定兩件波衫，一件畀佢，一件畀自己，自己件波衫印佢個名，咁就浪漫得嚟又唔會過火位。」
Annie G.呢個「歐國妹」確係有計，即刻download由《東方日報》同《太陽報》為歐國盃推出嘅「歐國波Something」App，喺入面嘅「歐國妹Polling」中全力為佢打氣，仲有機會喺觀塘apm同Annie G.一齊睇歐國盃決賽添！