陳偉霆：想30歲後更受尊重

我由2008年開始個人發展，依家都差唔多四年，初入行時思想簡單，只係諗唱歌跳舞，冇諗太多嘢，到單飛後，自己想嘗試唔同嘢，要搵清楚自己路向，要有個定位畀自己，男仔喺娛樂圈應該浸淫耐啲，咁先可以變得更有經歷。

做偶像要實力

我始終鍾意唱歌及拍戲，我好投入電影世界，之前演過乖仔、做過鴨嘅角色、甚至最近飾演古惑仔，希望自己駕馭到角色，我愈來愈鍾意演戲，達到精神分裂的程度，同公司溝通得好清楚。

偶像派定實力派？依家唔需要標籤啦，做到成功偶像本身就需要實力，你有弗爆身形，都係自己投放時間落去，係實力表現。紅唔紅？我覺得未紅，自己仲要把握好多機會，男仔始終要浸淫，不過呢幾年都搵到，滿意自己收入。

我依家26歲，希望30歲後可以好似郭富城、古天樂、劉青雲同任達華咁，得到好多Respect（尊重），佢哋都係我欣賞嘅前輩，因為經歷咗好多嘢，浸咗好多年，有種歲月痕迹，我覺得超級有型。恨唔恨同城城同台跳舞？唔會強求，我都希望有呢個機會。獎項嘅嘢，話唔恨就呃你嘅，我諗每個人都有自己嘅Goal（目標），但就唔可以強求太多，不過會努力爭取。

口述：陳偉霆 筆錄：專案組