阿Sa啤啤夫除鞋 足賀祖兒

祖兒前晚聯袂老闆楊受成、經理人霍汶希、Twins及胡歌等踏上海電影節紅地氈後去歎上海菜，然後再轉場到夜店開P慶生日。到賀嘉賓包括成龍、林雪等，場面熱鬧。

細個冧福山雅治

阿Sa與阿嬌（鍾欣桐）在派對上孖住見記者，阿Sa飲到面紅耳赤，大發嬌嗔指被祖兒灌醉。阿嬌則大爆阿Sa的偶像是福山雅治：「福山雅治有嚟上海，佢好鍾意對方呀！」酒醉三分醒的阿Sa急忙解畫：「讀書時睇電視劇鍾意佢啫，當時仲同啲同學仔爭老公添，我依家有新偶像嘞！（陳偉霆？）我唔會話畀你哋聽。」未知是否帶醉令心情放鬆，期間阿Sa突然不顧儀態脫下高踭鞋，原來是為了配合阿嬌高度。阿Sa昨日酒醒後即在微博公開「醜態」：「昨晚喝醉了……今天還在醉！醉Sa……」

阿嬌（左）與阿Sa吻賀壽星女祖兒。

祖兒打手勢要胡歌獻吻，可惜男方不解溫柔，要祖兒開口才懂錫錫。

兩杯落肚的祖兒受訪時心情靚爆，更打趣自己其實23歲。提到終身大事時，她說：「以前身邊人話邊個邊個對我有好感，我真係唔覺得，依家就要慢慢感受吓。（搵番個上海仔？）我係土生土長嘅港女，都係搵番香港仔好啲！」她又稱剛完成國語唱片錄音，除狂碌人情卡外，又不斷改進唱歌陋習，希望大家欣賞，成就她的生日願望。而有份出席生日P的鍾麗緹，亦帶醉下在保安掩護離場。

要《DIVA》拍檔獻吻

另外，昨午祖兒與胡歌出席主演電影《DIVA華麗之後》的記招，獲電影公司推蛋糕為她慶祝生日。期間她打手勢叫胡歌送生日之吻，可惜對方不解溫柔，要祖兒直接開聲才懂反應。祖兒又稱與胡歌及杜汶澤合作愉快，因為每天收工都會相約飲酒食飯，更被改花名「菠蘿」：「即係死八婆，佢哋話我好成日偷睇佢哋啲短訊，乜都要知喎。」她昨日完成工作後即飛返香港，會合容媽媽食飯慶祝。