陳偉霆：要學霆鋒咁硬淨

入行咁多年，近來呢件事（指捲入裸照風波）真係最大單，上埋A1（港聞頭條），咁大個仔未試過，我唔嬲點解件事會放上A1，因為呢個係娛樂圈，但坦白講，我係有啲忟嘅，而且好困擾，由頭到尾都唔知發生乜事，但清者自清，要回應都回應咗。

從未被富豪睇中

好彩公司絕對信任我，亦好保護我，即日幫我發聲明澄清。入行咁耐，印象中冇試過受富商或富婆睇中及引誘，甚至發生性騷擾，假若真係發生類似事件，我一定會謝絕，就算有人私下打畀我傾「公事」，我都會叫對方搵番公司傾，我唔會私下接洽，因為怕麻煩，有時我連工作酬勞都唔過問，全權交由公司處理。

我最欣賞嘅人係謝霆鋒，佢是非夠晒多，但佢嗰種硬淨係令我畀唔到藉口自己軟弱，佢連嗰種程度都頂得住，絕冇受任何人影響，繼續專心專業，結果得到依家嘅成就。講真，做呢行唔可以因為其他聲音，影響自己表現同埋情緒，我深明呢個道理，你話我擔唔擔心，我係唔擔心亦唔會唔開心。你有一百樣嘢畀人講，邊擔心咁多呢？

謠言最好唔去理

而且你係唔會封到佢哋把口，仍然有一小撮人有啲動作，但我知道我嘅目光唔係放喺呢度，之前夠傳我整容、又畀人惡搞，「而我不知道陳偉霆是誰」呢句都講咗好耐，解釋咗好多次，有啲人唔信就係唔信，我會無奈多過唔開心。有部分網民批評我至少四年，批評絕對接受，唱歌唔好我會去學，但無理惡意攻擊，我可以做乜？咁我不如索性唔去諗。坦白講，初頭都會擔心因為咁影響工作，客戶唔用你、冇戲搵你、公司唔出碟，總之影響到自己冇飯開我就驚，但事實證明呢啲批評對我冇影響。

黑材料練就忍耐

咁啱發生嗰單嘢，嗰晚我沖涼時諗，每次當我愈專心拍戲，又真係咁啱得咁蹺，總係有單「杰杰哋」嘅嘢搞你，每年最少兩三次。之前拍《前度》就爆分手，嗰時就不斷回應，到拍《出軌的女人》，就同阿Sa（蔡卓妍）拍拖，輪到依家拍《紮職》，就發生呢件事。

我又唔係話嬲嘅，只係唔知講乜好，只係試過苦笑，有時諗番轉頭，如果我唔入呢行，26歲仔點會經歷呢啲嘢，變得咁成熟，EQ變得咁高，所以我係冇入錯行嘅，而人生經驗亦上咗寶貴一課。

About陳偉霆

姓名：陳偉霆（William Chan）

年齡：26歲（1985年11月21日）

感情狀況：女友蔡卓妍

入行經過：2003年在無綫舉辦的新秀歌唱大賽香港區選拔賽後正式入行；2006年成為組合Sun Boy'z成員之一；至2008年作個人發展。

威水史：2008年於四台樂壇頒獎禮橫掃四個新人金獎，成績斐然，其後獲多位導演賞識，至今已接拍十多部電影。

代表作：

歌曲——《Taxi》、《今天終於知道錯》、《Do You Wanna Dance》等。

電影——《前度》、《出軌的女人》、《紮職》等

口述：陳偉霆 筆錄：專案組