陳柏熹：自己fing晒
每個人努力工作，為的就是積穀防飢，讓退休後可安享晚年。但假若你想未雨綢繆，你又會如何分配你的積蓄呢？已為人妻的名模諸葛紫岐及名媛邱李茂琪均以家人為先，會把財產分配給子女。同時亦不忘行善，預留部分作慈善用途，回饋社會。而「Moiselle太子爺」陳柏熹則大唱反調，笑言要於死前花光所有儲蓄。
陳柏熹
「我會盡量喺死之前用晒啲錢，一個仙都唔留喺呢個世界，哈哈！」
吳雨霏：阿媽細妹有得分
「我嘅財產只有一層樓，我會留畀家人，等佢哋平均分，所有衫就畀妹妹，手袋同珠寶畀媽咪，但就冇嘢可以益我阿爸同細佬。」
周汶錡：捐出靚衫
「我會將我嘅錢平均分配畀屋企人，最緊要大家開心。至於我嘅衫，捐出去囉，你哋鍾意攞乜就攞乜啦！」
諸葛紫岐
「如果有仔女，我會將一半財產分畀佢哋先，其餘嘅一半會捐去慈善機構，最緊要幫到有需要嘅人，例如基層小朋友係將來棟樑、老人家後生時又對社會有貢獻，而傷健人士喺公共設施上嘅支援不足，各方面都要重視同正視。」
楊崢：行善助脫貧
「我冇乜財產，如果要分，我希望將部分留畀家人，之後再捐去慈善團體，主要幫助窮人，改善生活環境同質素。」
陳姿允：保育益下一代
「如果我係億萬富翁又冇兒冇女，我會將全部財產捐去保護生態環境嘅慈善機構，因為環境被污染會嚴重影響生態發展，所以環保好重要，大家都想自己下一代有健康環境生活。」
邱李茂琪：幫助老幼傷健
「有諗過！有部分會留畀仔女，其餘作慈善用途，幫助小朋友、老人家或傷健都得，總之筆錢可以真正幫到有需要嘅人就得！甚至捐去保護動物嘅團體都可以。」
胡敏珊：弟妹傭人受惠
「全部畀晒妹妹及細佬，捐畀慈善機構又得，助手都得，總之錫我嘅人都會有財產分配到，諗諗吓，傭人都可以受惠，因為有照顧我，反正我人死後都帶唔走啲錢，留嚟都冇用！」
麥長青：唔留錢留竇
「最緊要係留個竇畀家人，依家太難置業，唔留錢唔緊要，有瓦遮頭就得喇！」
羅敏莊：畀晒ＢＢ
「為人父母梗係乜都畀晒仔女！我啱啱仲有咗ＢＢ，梗係畀晒佢，自己要條毛得喇！」