敏之弗爆水着引仔喪（目及）
昨日「索腿天后」陳敏之大騷弗爆身材為劇集拍攝游水戲，更吸引陳志健（Otto）及鄧梓峰等「狂蜂浪蝶」喪（目及），不過森美就直言：「我同敏之唔過電！」認真嘥料！而敏之更有不少熱身動作的鏡頭，Hot爆泳池！
陳敏之昨到油麻地為新劇《法網狙擊》拍攝落水戲，於劇中飾演其同事的鄧梓峰十足活潑版的卡通人物「巴斯光年」上身，於岸上大擺多個健美甫士吸引敏之注意，而Otto等人更潛入水「（目及）嘢」，場面搞笑！面對一班「麻甩仔」，敏之卻非常自在，更笑言：「佢哋都當我係男仔咁，所以我一啲都唔會覺得尷尬。」敏之更有不少在岸邊左扭右擰的熱身動作，加上其索爆長腿，令現場氣溫節節上升！
森美唔怕過電
首次拍攝游水戲份的敏之雖然略懂水性，但為了拍攝效果更專業，故亦找來替身頂替她的游水戲份，是次敏之以泳裝上陣大騷纖瘦身材，男友可有介意？她謂：「唔會啦，因為成個感覺好健康！」但她就指自己少於香港以三點式上陣：「我依家已經冇去公眾地方游水，我都驚畀人偷拍，入行前就會。（會唔會畀人望？）都會有人撩，不過其實都係開心嘅，因為靚女先會有人注意o架嘛！」而拍檔森美就嫌敏之太瘦，同時又笑言：「我同佢真係唔過電！」
Otto籌備婚事
於泳池邊着西裝的森美顯得格格不入，他笑言：「算啦，其實我都唔係好fit，我賣智慧嘅！」不過他就透露亦有一場全裸戲份令他難忘：「有場係講我沖涼時被敏之撞咗入嚟，當時我係全裸，只有啲泡泡遮住！之後我要用成個鐘沖走身上嘅泡泡呀！」首次拍劇的森美透露為了劇集唔單止暫停於電台的節目，更推掉不少工作：「加埋都三、四十萬o架，不過我覺得值得！（再拍？）要睇吓觀眾反應先決定！」
而身形健美的Otto就指拍攝氣氛愉快，將於今年尾拉埋天窗的他透露婚事主要交由未婚妻處理，又透露已決定擺酒日子及訂好酒席，積極為婚事籌備。
文：影視組