港男殺上大陸電視台撻掂翻版楊冪

無綫和亞視早前曾分別炮製了《盛女愛作戰》和《撻着》等「相睇」節目，內地亦有相關節目，更成功締結中港良緣！全國收視名列前茅的相睇節目《非誠勿擾》，在內地大受歡迎，昨晚播放的一集，講述任職高爾夫球雜誌主編的港男鍾兆倫，成功與「翻版楊冪」之稱的內地女作家吳瑜「牽手」，兩人已拍拖約一個月！

苦學四月普通話

Joeson接受本報專訪時，詳述參加《非》的經過，他說：「我喺節目留意到佢（吳瑜），對佢好有興趣，於是睇佢微博同上網了解佢，之後決心報名。5月初去咗廣州面試，面試過咗關，再約時間安排攝製隊嚟香港，拍攝我個人生活，之後我飛咗去佢家鄉浙江，了解佢成長地方，因為中國人對『家』嘅觀念好重。5月19日就上咗節目，我喺節目內講出自己心聲，同播埋片，結果贏得芳心同佢牽手，全場人喊晒。」Joeson續說：「之前吳瑜朋友開玩笑話，如果有人能夠牽走佢，會係2012感動中國十大人物之一。」

Joeson為結識女友而苦學了四個月普通話，他說：「不停睇內地劇、聽國語歌、搵內地朋友講電話同我練習，畀佢感受到誠意。」問到如何維繫感情？Joeson說：「大家好忙，靠微信及長途電話，我唔想太打擾佢，佢對事業好認真。」談到結婚問題，他說：「會有呢個目標，但仲需要時間了解，唔想草率決定。」問到有否買齊女友作品？他笑說：「全國搵唔到，就算網上訂購都冇，原來斷晒貨。」

欣賞女友夠智慧

對於吳瑜被指詞鋒厲害，Joeson為女友護航說：「可能有人覺得佢講嘢尖酸，但我幾欣賞佢，佢有感性一面，佢本身鍾意寫嘢，我欣賞佢才華又有智慧，（外表？）唔係最重要，最緊要合眼緣。」另外，愛上微博的吳瑜，曾上載多張性感靚女相，包括大露背及露Deep V的相片，相當誘人。

文：專案組