石天欣出埠拍劇笑料多
無綫新人石天欣已出發橫店拍攝劇集《金枝慾孽貳》，離港一個月工作，令只得19歲的天欣十分緊張：「緊張多過興奮，我一個月前已開始執嘢，想搬晒成間房上去！我體重得42kg，行李有23kg，多過我一半，朋友都笑我誇張。」因上次出埠拍劇皮膚敏感，天欣今次帶足防敏感藥、口罩，又自備床單及枕頭套：「一返香港又要拍另一套劇，唔想自己病而影響進度，所以去橫店都唔亂食嘢，只會食基本飯菜仲要戒肉，相信返嚟又會瘦咗！」
天欣與母親向來感情要好，為解相思苦，兩母女晚晚以視像會議傾偈，母親叮囑她盡量留在房間免生危險。