黃貫中：我係Beyond 1/3咋
神級樂隊Beyond明年成立30周年，歌迷正引頸以待，望三子如08年傳聞一樣，為錢再度「合體」開騷。不過黃貫中（Paul）以自己只是「Beyond1/3」為由，表明除非三子一同發言，否則不敢單獨談論開騷與否。
明年就係Beyond 30周年，好多人問我，到底Beyond會唔會開紀念演唱會？我可以講嘅係，我係Beyond1/3咋喎，除非三個人一齊坐喺度發言，否則我唔方便講咁多，我個人意願係隨時候命，最緊要大家開開心心。
近年有好多Beyond不和嘅傳言，我想問點解我同佢哋唔妥先？我認大家各有各忙少見咗，感情係淡咗啲，但近幾年我都有家強、世榮做騷喎，只不過係同佢哋個別做之嘛。我接收到嘅訊息係，大家冇去到呢個地步。阿榮有時係怪怪哋，佢乜都唔講，一個又話冇嘢，其實又好有嘢。
肯代世榮打鼓
一年前我收到世榮嘅訊息，佢話其實想唱歌，唔係好想打鼓，我話我好鍾意打鼓，不如我打啦，我淨係驚一樣嘢，就係打得勁得滯。我都好諒解世榮，打鼓打到佢的境界，無敵是最Ｘ寂寞嘛，打得太耐亦都好攰。作為相識30幾年嘅隊友，佢哋有自己空間，成員有乜想做，我都盡量配合。我知有人係敏感咗啲，邊有人冇弱點呀？以前可以包容，點解大個咗又唔可以呢？
又話家強唔鍾意世榮用Beyond個名做騷，我就覺得好難怪世榮，返大陸做騷就算話明唔用Beyond個名，啲主辦商都詐詐諦諦套Beyond個名落去。可能每個人都有個死穴，咁佢有權唔鍾意嘅，但張學友都玩Beyond嘅歌啦，佢哋玩得，點解我哋又唔玩得呢？
口述：黃貫中 筆錄：音樂組