杏兒阿佘鬥快買千萬豪宅
【呂詠雯上海直擊】近年大批TVB藝員轉戰內地拍劇搵真銀，昨日多位小生花旦到上海出席電視節鬥晒身價，胡杏兒笑言拍兩套劇夠買千萬豪宅，佘詩曼表示拍一套就夠，馬浚偉則搞笑表示「一套半」，至於黃宗澤亦承認每集酬勞接近20萬元，力追視帝鄭嘉穎！
不少TVB的花旦小生轉戰內地拍劇，片酬每集動輒萬萬聲非常和味！昨日多名TVB出身的藝員現身「上海電視節」，宣傳有份拍攝的內地劇，大鬥身價。黃宗澤（Bosco）與內地女星唐嫣宣傳《麵包樹上的女人》時笑言有加片酬，問到是否跟視帝鄭嘉穎一樣廿萬一集？他說：「附近啦！冇佢咁勁！（儲老婆本？）多啲都好，個底厚啲！」他自爆跟唐嫣有咀戲，但不用向女友杏兒備案，又否認買求婚戒指。
放下感情事密接劇
嘉穎及杏兒則先後在樂易玲陪同下出席不同的內地劇宣傳活動，嘉穎現身劇集《萬水千山風雨情》活動時，得知Bosco片酬達廿萬即笑說：「衰仔搵咁多o架？都啱嘅！咁要請食飯啦！」在旁的樂易玲踢爆嘉穎希望買三棟別墅，尷尬不已的嘉穎說：「老細，你講埋落去喇！」之後他才解畫：「想分別買畀媽咪、自己同第時個仔。（搵女友？）依家所有理想都喺晒大陸，但未搵到女友。（約佘詩曼飯局？）唔會，避免無謂花邊新聞。」
杏兒宣傳《金玉滿堂》時被樂易玲踢爆她乃TVB花旦中叫價最高一個，令伊人笑晒口默認。杏兒稱不敢再加價，並透露拍了兩套內地劇已可買千萬豪宅：「都睇咗心水盤，香港冇過千萬買唔到樓啦！（同Bosco住？）冇預佢！會同八隻貓及姐姐住。（佢儲老婆本？）都唔一定係（娶）我！」阿佘宣傳《嫁入豪門》時，表示替TVB同事有錢賺而開心，問她是否亦買到豪宅？她說：「睇每個人心水啦！（拍幾多套就買到？）一套都買到。」她又否認舊愛陳浩民搬近其片場，反而曾與《金枝》監製戚其義食飯，問到感情生活，阿佘直言一片空白。
馬浚偉「套半」夠數
至於馬浚偉宣傳內地劇集《鴛鴦佩》時透露將返港與TVB傾約，當他得知杏兒及阿佘可極速買樓後，他笑說：「咁我一套半喇！」又表示想在北京置業。此外，另一花旦蔡少芬（Ada）最近憑《甄環傳》在內地人氣急升，早前以7位數酬勞接拍奶粉廣告，她昨日被問到是否收廿萬一集時，只笑而不答。