黃貫中：冇認真望佢一眼

我同朱茵拍拖14年，好多人以為我哋係入咗娛樂圈先識，其實我哋第一次邂逅，係我同其他band仔去佢嗰間香港演藝學院學校度表演。記得我第一次見到佢，就同隔籬個band仔講：「你睇吓你4點鐘位嗰個女仔好索喎。」因為我要扮型，所以冇正眼望過阿茵一眼就走咗。

10年後，阿茵咁啱住咗喺我樓上同一個單位做咗2年半鄰居，雖然我嗰時對阿茵已經好有好感，但我又冇膽去識佢，只係大家經常喺大廈大堂撞到，好彩時仲會搭埋同一部𨋢，每次我同佢搭埋同一部𨋢時都好戇居，會全程望住𨋢嘅樓層螢幕，個腦不停諗：「嘩，靚女呀，我好想望，但唔好望呀，要忍住呀，我好型嘅，唔好吞晒口水咁猥瑣呀。」

勸明哥唔好變直

我第一次終於鼓起勇氣約阿茵去街，就係喺我臨搬屋前，打電話畀佢問佢有冇興趣一齊去狗展，佢話有，但傍晚要搭飛機去台灣做嘢，於是我咪話睇完狗就車佢去機場，點知我同佢第一次約會，手都未拖就畀記者影晒相，嗰次我被唱片公司高層召返公司，雖然冇照我肺，但就好嚴厲咁同我「了解」，好在冇嚇窒咗追佢嘅心，繼續約朱茵去街。

我同阿茵拍拖後，先知道佢未入行前已好欣賞我，我話唔信，阿茵就拎咗兩張相畀我睇，第一張係佢喺高山劇場門口影嘅相，相中嘅我好似路人甲咁行過，佢就扮同我影合照，第二張仲戇居，佢竟然挨埋部電視度，扮同電視中唱歌嘅我合照，不過阿茵唔係我Fans，佢真正鍾意嘅係達明一派嘅明哥（黃耀明），好在明哥係攣（同性戀），唔係我就冇機會，多謝明哥，佢千祈唔好變番直呀，如果直番我就×街。

筆錄：音樂組

口述：黃貫中