周志文買3萬蚊傢俬 CoCo埋單

周志文今年4月被指「一腳踏兩船」，背有米女友CoCo搭上無綫小花馬賽，雖然他否認傳聞，又與CoCo劃清界線，但原來只是擘大眼講大話。據知，他與CoCo未有甩拖，轉玩地下情，更獲對方「照顧」，入住女友貝沙灣豪宅同居；日前兩人拍拖買傢俬更斷正！

腳底按摩冧男友

當日下午約3時半，身穿長裙的CoCo與戴Cap帽的周志文現身九龍灣商場，兩人先選購泳衣及情侶拖鞋，並由CoCo找數，其後再攻傢俬店。周志文於店內不時拉低帽子，似不想被人認出。未幾兩人睇中一張價值近3萬元的梳化，試坐完更火速扑錘購買。

女店員遞上帳單，CoCo即遞上信用卡找數。	CoCo於傢俬店公然為男友按腳。	周志文與CoCo逛街時經常左望右望，似擔心戀情被揭。

等候店員期間，兩人坐在梳化上各自玩電話，周志文更如大爺般攤在梳化上，CoCo見男友充滿倦意，施冧招為他按腳，周志文即露出享受表情。其後店員遞上帳單，打斷兩位小情人煙韌，最後仍是CoCo拿出信用卡找數。

發現記者分頭走

之後兩人再睇雙人床，懶理途人目光坐在床上狂Un，測試柔軟程度。期間CoCo忘形Un甩Bra帶，周志文即細心為她整理。雖然Un足十分鐘，但二人未有購買。其後兩人轉戰另一傢俬舖時發現記者，即分頭離開，非常鬼祟。

文︰專案組