余詠珊：同環球冇偈傾
無綫非戲劇製作總監余詠珊昨日出席活動時提到要唱片公司簽備忘錄，強調無綫不是專橫，但直認與環球進展不順利：「有冇佢哋我哋都會認真做音樂，如果唔想同無綫做朋友，好遺憾。我哋唔會主動再傾，依家閂埋門喇！」
另外，余詠珊昨日接受電話訪問時再補充：「所有歌手都要簽，備忘錄冇法律約束力，唔係獨家嘢，冇唔畀歌手上其他電視台做同類型節目，但佢哋參與嘅節目，我哋有權賣。」她再強調沒有封殺任何唱片公司：「我哋想同大家做朋友，但環球將問題複雜化，為難無綫，我哋依家覺得係環球封殺無綫。」她又指環球不會有歌手出席「紅白」。余詠珊在記招上指下周六（23日）無綫將獨家轉播韓國KBS電視台於亞洲博覽館舉行的音樂會，明年亦會有多個歌星特輯，包括李克勤與容祖兒、林峯與鄭嘉穎、羅志祥等等。
而環球董事總經理黃劍濤對余詠珊反指環球為難及封殺無綫，他說：「佢鍾意點講就點講，唔回應。」他重申無綫要求全權擁有歌手為其演出的版權條款是不能接受：「大家立場唔同，無綫係有播放權，但播放之後個版權點做同點用一定要傾先得。」