天明賭牙骹 捉老婆捱夜
球壇盛事歐國盃已展開數日，圈中不少星級球迷均廢寢忘餐，冷落另一半為追波睇，阮兆祥女友、羅家英賢內助汪明荃及任達華太太琦琦等都甚為體貼，沒有詐型；而喜歡賭牙骹戰的洪天明更會捉埋老婆周家蔚一齊睇波，熱鬧一番。
歐洲國家盃晚晚均有精彩賽事，今晚深夜英格蘭對法國一場更是全城熱捧，不少圈中球迷不惜捱夜睇波，此舉隨時引來伴侶不滿，幸好不少星級另一半均屬體貼一族，體諒男友或老公追波，一個月咁多啦！
祥仔女友開通
洪天明前晚錄影無綫歐國盃節目時表示不怕冷落老婆周家蔚，更會邀對方齊齊睇波：「唔怕！大家各自有興趣，就算睇波都可以一齊，而且都唔係睇足成日吖！」他又表示過去曾賭波，現在只會跟朋友賭牙骹玩餐飯，只要不沉迷便可。
阮兆祥亦大讚女友開通，會陪坐睇波及為他炮製消夜：「我哋都咁多年，經歷過晒世界盃同奧運，一直冇事。（怕女友心入面不滿？）唔會，大家都有私人時間，我都唔會管佢修甲美容，佢知道睇波係男人Party，唔會話一定要嚟。」
堪稱「老夫老妻」的阿姐汪明荃及羅家英更會孖公仔漏夜睇波，阿姐前晚在微博表示與家英哥邊吃米粉邊睇波，認真Sweet！
任達華「偷睇」
最近忙於拍戲的任達華則表示沒有太沉迷今屆歐國盃，但也會抽時間「偷睇」，並會跟琦琦一齊欣賞：「我哋都好鍾意英格蘭，所以會一齊睇，佢唔會詐型。（唔推戲睇波？）因為想遲啲放大假去倫敦睇奧運。」
此外，無綫與now前晚安排陳百祥（阿叻）及李克勤隔空對話講波，別開生面，阿叻與克勤開玩笑說：「乜你去咗咁遠，平時都坐喺隔籬！」克勤即打圓場表示開心足球，到哪裏睇都一樣。
文：影視組