千嬅B終曝光 富貴鼻桃花眼超靚仔
楊千嬅和老公丁子高跟兒子Torres全家福溫馨相曝光，BB的富貴「段鼻」似足媽咪，眼仔和食力嘴就似爹哋，更大晒可愛笑容！千嬅透露每2小時餵一次人奶，老公丁子高就化身銀針幫千嬅試食陪月餐。
38歲的楊千嬅於上周二誕下囝囝Torres，前日撇甩在醫院守候的記者，靜悄悄抱BB返家坐月。千嬅昨日終公開一家三口的幸福照，初為人母的她手抱寶貝仔，紅粉緋緋的她氣色很好，兒子Torres雖然只有6日大，但已收晒水見靚仔樣，頭部圓圓頭髮濃密，一個「段鼻」似足媽咪，長長眼線、嘴嘟嘟就似爹哋，眼仔睩睩又表情多多，氹得父母十分開心。
24小時電眼(目及)實
千嬅返家後，專心坐月調理身體，據知她暫時謝絕親友探訪，直至12朝後才會招呼親友探望BB。因為千嬅和丁子高都是新手父母，兩人十分緊張，故在BB房裝了家居網絡電視，方便全天候24小時睇到乖仔的情況，以察安全。
千嬅是次剖腹生產，經數天休息後，已回復精神，她接受電話訪問說：「好多謝大家關心同祝福，出院嗰日因為傷口仲痛，所以冇見大家，希望大家見諒。」生完BB之後的5日，千嬅在醫院也沒有真正休息，她說：「我每隔2粒鐘就餵一次奶，直到返咗屋企，自己第一時間學識泵奶，交畀陪月喺半夜餵囝囝，依家我先至真真正正瞓到幾粒鐘，所以今日精神好好。」
老公搶食陪月餐
丁子高前日透露有10人團隊侍候囝囝，包括外父外母，又有指千嬅聘請數位傭人專責照顧囝囝，她澄清其實只請了一位陪月：「我好想親力親為照顧BB，自己以前做護士都算有根底，大家唔使太擔心，不過始終開刀生仔，傷口未完全復原，依家飲食都要清淡啲，所以陪月會照顧我一日三餐。」
千嬅還踢爆老公搶食陪月餐：「陪月煮嘢食好好味，每次一攞食物出嚟，老公就變咗支銀針，乜都要試食，好似頭先有碗豬肉湯，佢就一啖飲咗三分一碗！Torres呢樣嘢最似佢爸爸，飲奶完全唔使擔心。」問千嬅會否追多個仔女？剛生完的她笑說：「吓！等我適應咗先啦，依家先開始適應做媽媽呢個角色，呢啲慢慢再諗。」
丁子高亦在微博上載一家三口相，興奮留言：「三人新世界終於開始了！」容祖兒、何韻詩和網友們則紛紛恭喜。
文：音樂組