周秀娜女神19式升級指男
本身已經熱到爆燈，但「歐國波Something」App仲嫌未夠hot，即日起有埋Android版本畀大家下載，真係邊個夠佢玩？明日起更推出由周秀娜領軍嘅「女神19式」，以及激正「即時戰報」終極上App，大家唔好一窩蜂download呀，down server盞冇癮o架咋！
「歐國波Something」App本來只有iPhone版本，一推出已經大受歡迎，昨日已打入App Store下載金榜頭五位，更加係新聞類別第一，難怪去到邊都見到型男索女喪玩。歐國盃將於周六凌晨零時正式開幕，為配合開波勁勢，依家仲精益求精有埋Android版本，Android用家唔使望到頸都長喇，依家受埋你玩，安樂晒啦！
香港人要求出名高，而且又貪新忘舊，熱潮嚟得快去得仲快。「歐國波Something」點會唔知呢個道理，故趁開波嚟個「極限升級」，明日起推出重量級環節「女神19式」。冇錯，女神呢個名唔係個個孭得起，但周秀娜又點睇先？娜姐今次將擔大旗，話畀你聽睇波都可以增進男女感情，帶領Jeana、Hailey C、Hidy、Annie G等索爆師妹談情講波，盡騷高招教你點實男友，真係又睇得又打得。
專業娛樂兼備
話明係歐國盃App，齋夠娛樂性又點企得住腳？為配合大賽開幕，激正「即場戰報」將強勢登場。喺呢度你不但可以搵到各場大戰開場陣容，仲可以睇埋即時文字直播，賽後更有球員評分，以及一眾星級名家過癮、精闢點評，就算出咗街睇唔到直播，所有賽事都盡在你掌握。另外，資料庫亦全面加料，落齊各類有用投注資訊，既詳細又UPDATE，絕對係投注好幫手。呢個App專業、娛樂性兼備，一個字，掂呀！
