千嬅湯水足餵20分鐘人奶
楊千嬅跟丁子高的心肝寶貝囝囝「RMB」前日出生，千嬅昨興奮試餵20分鐘人奶，又透露「RMB」已改了型爆英文名Torres，跟車路士靚仔球星費蘭度托利斯（費托）同名，更深得天后媽咪遺傳，出世2日已嘴仔郁郁想唱歌！
千嬅前日剖腹誕下7.6磅龍仔，昨午約12點半，千嬅父母、丁子高媽媽和外祖母喜孜孜到醫院探望，千嬅助手則攞住兩大袋東西，據知是楊母煲的谷奶湯水，記者向老人家致賀，楊父笑到四萬咁口說：「多謝。」
新祖父母探孫
一小時後，千嬅父母先行離去，問BB樣子似邊個？他們滿面笑容說：「兩個都似，眼仔好大。」楊父謂未有機會親抱乖孫，但千嬅身體很好，多謝大家關心，之後丁媽媽亦拖着老太離開，問點獎勵新抱？丁媽媽只說：「好開心。（有冇幫手改名？）問番我個仔。」而她於晚上8時折返醫院，專程送食物給新抱享用。
未諗好中文名
而千嬅經理人公司發言人公布BB改了英文名Torres，跟車路士球星費托同名，由丁子高和丁媽媽一齊改，據知因他們都愛睇波，鍾意費托靚仔又好波，中文名則未想好；初為人母的千嬅心情很興奮，覺得寶貝仔好特別：「BB昨日眼仔睩睩，今日就掛住瞓，但成日嘴仔郁郁發聲唱歌，好似我，哈哈。」千嬅的傷口已漸康復，但昨日仍感疲倦，未能落床，不過前晚試餵了20分鐘人奶，她笑說：「唔知BB啜唔啜到呢！」據知千嬅會繼續餵人奶，讓兒子得到最好的營養。
採訪：音樂組