Kelly 破冰入無綫：好凍
兩子之母陳慧琳（Kelly）前晚為無綫擔任節目嘉賓，自無綫與四大唱片破冰後首度亮相無綫，她透露已有兩年沒有「入城」，如今再次踏足直言好凍！她更指無綫地方大，只識行去一廠及排舞室位置，其餘地方卻不太熟悉。
前晚Kelly、劉心悠、曾志偉等現身電視城，錄影由草蜢主持的遊戲節目《環遊世界明星賽》，自四大唱片風波後，首度踩入無綫的Kelly明顯經過悉心打扮，從化妝間步出會見傳媒時，更模特兒上身，行貓步讓大家拍照，雖然誕下第二名兒子「小龍包」後已修身不少，但貪靚的她卻指距離目標尚有10磅，都要積極減磅。
支持一個頒獎禮
已有兩年沒有踏足電視城的Kelly，被問到重臨舊地感覺如何？她謂：「有啲嘢唔同咗，但都有見番呢度啲工作人員，不過好誇嘅係，個廠仍然咁凍囉！超凍添呀！（有冇唔認得路？）之前都唔係好認得路，TVB太大，我來來去去都只係識去一廠同排舞室，（之後會唔會多啲合作？）破冰之後有咩節目都可以上，之後回歸Show都有份唱歌，係香港首次公開唱歌，不過到時唔會帶蝦餃仔去，因為幾粒鐘佢坐唔定，又驚。」
對於有其他電視台欲舉行頒獎禮，Kelly坦言參與表演絕無問題：「就算要角逐都未有新歌啦，咁我去邊個台都得嘅。（支持其他台搞音樂頒獎禮？）唔係好支持，因為唔係咁有說服力，節目可以多啲，但頒獎禮咁多個台搞一個仲好啦。」
志偉玩盡五大「洲」
至於志偉則以已故荷里活影星奇勒基寶打扮示人，期間大玩不文笑話，對於草蜢表示上集未能邀請他做嘉賓，志偉表示：「今次點都要上嚟，因為現場有食香蕉同餵人奶嘛。」及後對於節目將玩盡五大洲，他即指向幾名猛男，笑言加在一起便是五大「洲」，引得現場觀眾笑聲不斷。
文：影視組