許亦妮接迷魂短訊陰影再現
沉寂了一排的迷魂黨，在大陸又再度活躍起來？近日WhatsApp瘋傳一段提醒人們在大陸要小心迷魂黨出沒的訊息，昨日港姐許亦妮、音樂家孫穎和楊千嬅夫婿丁子高亦收到此WhatsApp。其實許亦妮的母親今年曾在東莞慘遭扑頭黨扑頭，她至今仍留陰影。
港姐季軍許亦妮昨亦收到提醒人們在大陸不要胡亂聞別人兜售的鐵觀音茶葉和海味乾貨大蒜的WhatsApp，否則有可能成為迷魂黨的目標，許亦妮的母親在大陸經營美容生意，今年3月在東莞疑上錯賊車，下車時慘遭人扑頭，被搶去財物，她說：「媽咪依家無乜事，自從媽咪畀人扑頭後，短期內佢都唔敢再返大陸，我自己因為工作需要有時都會返大陸，不過經過媽咪件事都有陰影，依家返到大陸會警覺性更高。」
朋友遭禁錮
而鋼琴大師劉詩昆徒弟孫穎表示亦看過此WhatsApp，更透露自己的朋友剛遭迷魂黨禁錮，她說：「佢一過羅湖就有人扮假公安請佢幫手查案，上車後聞咗一啲嘢，令佢好暈，迷迷糊糊畀人帶咗去一間屋，被匪徒逼佢講咗信用卡嘅密碼，因為我朋友張卡有七十幾萬，所以佢被困住成個月，匪徒每日提取上限，定時有人畀飯菜佢食。」她說朋友之後被人蒙住眼丟在街上，現在她的朋友以後也不敢再到大陸。
唔會四圍去
至於丁子高經常會提醒朋友和屋企人，就算在香港，也要提防陌生人走近，他說：「我喺上海同北京做嘢多，咁多年嚟都無聽過有迷魂黨呢啲事。我聽過傳聞喺大陸有啲修甲店，表面係修甲店，但其實係賣內臟，有適合買家就會落手，將你迷暈，當你清醒後身體無端端多咗個傷口，原來畀人割咗部分內臟。」
而經常往返大陸工作的名模陳嘉容和姚書軼，認為時刻提防好緊要，陳嘉容表示每次出埠必定有助手陪同，工作完便走，不會四圍去，而姚書軼表示只會到大型具信譽的百貨公司購物。
文：名人組