Baby旺角遊街 趙又廷充保鏢
Angelababy無懼「熊抱」抽水事件再次發生，前日竟踩落旺角為新片遊街造勢，型男趙又廷為確保拍檔安全，義務做貼身保鏢沿途護駕，Baby大讚又廷體貼有風度之餘，亦不忘將對方露點作笑柄，稱又廷為「趙一點」。
Baby與趙又廷前晚到中環出席《第一次》首映前，先拉隊到旺角遊街造勢，粉絲與戲迷反應相當熱烈，把兩人團團圍住。鑑於Baby早前在內地遭「熊抱」抽水，電影公司前晚安排保安全程護駕之餘，就連趙又廷亦主動做其貼身保鏢，確保Baby安全，難怪Baby事後大讚他有紳士風度。
自嘲「楊一杯」
問到Baby對於「熊抱事件」是否猶有餘悸？她竟膽生毛謂：「又唔係好驚，因為見到嘅都係熟口熟面嘅fans。」
由於今次合作新片過程相當愉快，Baby與趙又廷坦言想再合作，男方更覺得彼此已培養出默契。Baby則自爆謂：「我哋都係『一』字輩，我係『楊一杯』，因為飲一杯就醉，佢係『趙一點』，因為電影海報佢露咗一點嘛。」搞到型男面紅耳赤。
另外，對於年僅17歲的弟弟為其MV擔任男主角，因而被各界「虎視眈眈」，Baby坦言就連自己經理人亦有意把細佬收歸旗下。Baby雖指弟弟已成長，自己可決定前路，但又補充說：「都係讀書先啦，況且佢咁怕醜，暫時應該唔會（入行）嘞。佢都有投訴我，話搞到依家個個都知佢係我細佬喎。」
另外，昨有指Baby到西安宣傳另一新片時遲到四小時，其經理人Kim在電話否認其事，並將電影公司之行程表轉發給記者，力證Baby準時。
文：影視組