黎淑賢keep住保鮮 陳煒靠煮

犧牲換來溫馨之家

黎淑賢：黎 陳煒：陳

黎：我哋選完亞姐咁耐，其實都係近呢幾年先熟落！

陳煒

黎淑賢

陳：你選完就嫁咗，不過，你依家都好幸福，有老公錫、囝囝又聽話，真係好令人羨慕！

黎淑賢的作品。

陳煒畫的作品。

黎：有啲人問過我，做咗亞姐後，結婚、生仔就係咁一世，犧牲好大，我就答佢哋，其實我嘅犧牲，亦都有好大回報，就係一個幸福溫馨嘅家庭生活。講到湊仔，其實我老公（許智政）都係一個大細路！不過，我覺得煒哥你都唔錯，老公雖然因為工作周圍飛，但可以互相掛住對方，呢種感覺好浪漫，而且大家有種空間感，咁樣仲舒服！

黎淑賢讚陳煒有義氣，搞活動必定幫手。

陳煒

陳：又啱，所以我咪離佢遠啲，等佢Focus我多啲，留意我多啲，依家我復出多咗見報，佢就會睇，老公話見到我上電視個樣，同佢身邊日日見住嘅老婆唔同，好好笑！

黎：兩個人就算結咗婚，都要時不時耍吓情趣，先可以令段感情有新鮮感，好似我咁，我唔怕做主動嗰個o架，例如寫張字條「我愛你」放喺佢褲袋，等佢摷袋時見到都幾得意！又或者沖完涼喺浴室塊鏡度寫「I Love You」，浴室有蒸氣，就算開門後啲字冇咗，到佢去沖涼，又有番蒸氣，啲字又浮現番出嚟，咁佢咪睇到囉！我老公睇見，又會喺塊鏡上寫番「Me Too」，都幾Sweeto架！仲有，要畀佢知道你係為佢而生存！

陳：我從來都冇諗過呢啲情趣，一味就識煮嘢畀佢食，所以我不停咁鑽研料理，佢鍾意食嘅嘢其實好普通，火鍋囉！佢鍾意食嗰啲醬汁，我周圍搜羅好味配料，見到老公食得好滿足我就開心，可能呢種係另一種情趣！

共同興趣閒來畫畫

黎：除咗交換氹老公情趣，其實我哋都有共同嗜好，就係畫畫！我喺你微博上見到你幅畫，我覺得你好勁，你話冇學過都可以畫得咁好？

陳：其實我喺網上見到一幅笑騎騎嘅鴕鳥好得意，於是跟住畫，幾個鐘我就完成！點解有呢個興趣呢？係我之前跟老公去公幹住喺北京，嗰度啲畫畫材料好平，我買咗好多，之後又搬去泰國，平日冇嘢做就畫畫！

黎：我就學咗一年，之後忙照顧老公囝囝，放埋一邊，但我都完成咗一幅畫，後來我送咗畀「世界眼科組織」，依家擺咗喺佢哋office！呢幅畫我用咗兩個月先完成，畫畫真係要好有耐性，我個人性急，畫畫後令我個人心境平靜咗！

陳：畫畫反映性格，我會好快咁畫完一幅畫，實質畫功好粗糙，亦都反映我嘅性格係粗枝大葉、冇耐性。

黎：你個性格畀我感覺其實係好有義氣喎，雖然選完亞姐後我哋唔多交往，但近年相處多咗，我有啲活動搵你幫手，你二話不說就應承，呢啲咪朋友囉！我身邊係有好多朋友呀，但到搵人幫手，佢哋就多多問題……

陳：真係多謝你咁讚我！我都覺得自己人緣唔錯，先有咁多機會！

文：影視組

攝：黎志輝

黎淑賢　

化妝：Stephenmakeup.blogspot.com　

髮型：Ringo Cheung@Salon NOVA

陳煒　　

服裝：I Posh　　　　　　　　　　　

髮型：Patrick So@HH Salon