Eason嬲爆 叫fans咪幫襯
陳奕迅（Eason）8月假亞博開三場騷，據知內部認購已超額七倍，門票明天才公開發售，上周五已有南亞裔排隊黨霸頭位部署搶飛，還開價$600排一日，Eason怒轟排隊黨搶錢，呼籲fans唔好買炒飛，寧願貴飛位吉晒都唔好益排隊黨！
繼美國百變天后Lady GaGa上月假亞洲博覽館開騷湧現排隊黨後，Eason接力成為排隊黨的搵錢目標，本報昨日收到讀者投訴，指Eason個唱出現南亞裔排隊黨：「表弟昨日喺博覽館排隊，排頭位嘅南亞裔人同表弟講：『我boss可以即刻吹雞叫五十人落嚟排隊。』我聽完好嬲，究竟呢啲係乜人，我哋真係想睇就一票難求，呢啲人就要飛嚟炒，唔知乜世界。」
「知少少」做代表
昨日記者到亞博了解，果然發現一名南亞裔男子排隊，他承認前天已和兩名朋友來霸位買飛，問可知誰是陳奕迅？他竟答：「A little bit。（知少少）」還反問記者是否想買飛？可以出多少錢買位？他還報上「行情」說：「一日收$600。」即排至售票當天，不計門票單是「排隊價」便收$1,800。至於尖沙咀和銅鑼灣的通利琴行亦出現櫈仔、背包、紙盒霸位，在銅鑼灣通利有位印尼籍女子表示昨早來排隊，打算買飛跟朋友睇騷。
最好打指模買飛
Eason昨日在重慶開騷，他接受本報電話訪問時鬧爆排隊黨猖獗：「嚇一大跳！有冇搞錯，如果真係call五十人嚟好唔公平，fans一定要報警，最好排隊嘅人打晒手指模，每人憑指模限買兩張飛。」對於排隊黨收$600一日排隊費，Eason狂插說：「搶錢，我最貴啲飛都係$680，咁佢諗住炒幾多錢？fans千祈唔好買炒飛，我寧願啲貴飛位吉晒，都唔好益排隊黨。」
文：音樂組