何佩瑜剪爛波衫 蒲吧獵男
好多人話歐國盃期間，男人會掛住睇波，搞到周街都係「足球寡婦」。Jeana（何佩瑜）樣靚身材正，被追經驗多籮籮，佢話有危先有機，呢個時候反而係全城「盛女」「獵男」嘅好時機。Jeana建議女仔可以着上DIY性感波衫「應節」，落吧結識睇波型男，大家咁啱嘴形，應該可以火速撻着。
Jeana拍過《喜愛夜蒲》，對夜蒲生活當然瞭如指掌，佢已完全掌握男人心態，絕對有資格做「盛女」嘅「人生導師」，佢話男人着波衫可能老套少少，但女仔着就完全唔同喇，絕對可以帶畀男士新鮮感：「當然件波衫要考究啲啦，姊妹們可以考慮着女裝細碼，可以騷到優美曲線吖嘛！」
避開油尖旺
Jeana仲有好多橋：「如果再花心思啲，可以攞把鉸剪出嚟，發揮design天分，呢度剪一忽、嗰度又剪一忽，設計出獨一無二嘅自家球衣。當然剪到露腰會吸引啲啦，行出街包保你outstanding！」
歐國盃期間好多酒吧都爆場，冇位點算先？「油尖旺酒吧到時會爆晒，所以各位姊妹應該去遠少少，到灣仔嘅清吧玩。灣仔一來冇咁雜，二來唔會咁多人，開波時間肯定有好多睇波型男聚集，到時佢哋見到你，可能唔得閒睇波，只係同你傾偈喇！」
下載App打氣
聽落Jeana呢條橋真係掂，如果大家都buy，即刻download由《東方日報》、《太陽報》推出、喺iPhone有得下載嘅「歐國波Something」App，再喺入面嘅「歐國妹Polling」中同佢全力打氣，就有機會同Jeana排排坐睇歐國盃決賽喇！