古天樂唔敢騷擾吳宇森
大導演吳宇森因患重病而擱置原本計劃今年開拍的電影《生死戀》，有份參演該戲的古天樂透露大導的病情好轉，而電影亦落實明年開拍，為讓吳宇森養精蓄銳，他不敢騷擾對方。
古天樂（古仔）前晚以代言人身份出席Samsung Galaxy S III活動，表示現孭了不少電話債上身，不少朋友找他買電話，笑言現似電話sales。古仔又透露之前接了吳宇森執導的電影《生死戀》，但因對方患重病而遲遲未開拍，古仔表示：「我有同佢聯絡，佢病已好轉，套戲本來今年初開，依家出年開拍。（有冇同吳導演經常聯絡？）佢需要休息，唔想打擾佢，只知套戲出年一定會開。」古仔又透露手上都有好幾部戲，問他是否有動作戲？他說：「唔多唔少，但唔可以因為腳傷而唔拍，接到再同戲組商量，大家遷就唔難。」
Mia當禮物醒Avis
另外，前晚PCCW亦舉行Samsung Galaxy S III開售宣傳，找來黃浩然、黃德斌、模媽Mia、Alice B.等扮作搬運工人，在大街推住一箱箱最新的手機。着上低胸背心短裙的Mia表示不怕有途人對她毛手毛腳：「拍住黃浩然唔怕其他人對我冇禮貌，如果遇到呢啲事情用手機拍番佢哋，然後放上網，（遇過？）冇，喺出面做嘢會打醒十二分精神，我有買防狼器，不過未用過，有需要保護自己。」
問到與周秀娜男友Avis再傳緋聞，指兩人出街翹手，她解釋：「我哋出街對戲，嗰日係Avis生日，導演講笑同Avis講話『送咗份禮物畀你』，關係熟落咗，拍激情鏡頭都唔會尷尬，（唔怕娜姐嬲？）佢呢排都好忙，我諗佢都冇時間理Avis啲嘢。（乘虛而入？）我唔鍾意Avis呢類型，我鍾意細心嘅男仔，（Avis唔細心？）我鍾意青靚白淨書生型，同埋有愛心，（Avis冇愛心？）未體會到。」
文：名人組