陳奕迅享受「快」感 幾分鐘造人
【羅宛君深圳直擊】陳奕迅（Eason）早前揚言有意追多個，可惜忙於巡迴個唱無時間造人。昨日他出席深圳站個唱記招大搞爛gag，自爆造人時間「幾分鐘就搞掂」，即被取笑是「快槍手」，搞到Eason尷尬笑說：「關你咩事！」
Eason將於7月7日假深圳舉行一場巡迴演唱會，他昨日專程到深圳出席個唱記者會，吸引半百傳媒採訪及過百歌迷到場支持，Eason獲主辦單位送上單車預祝個唱成功，席上有兩名女歌迷扮太監及皇上讀出聖旨，抵死的Eason即跪地接旨，更gag神上身說：「陳奕迅、好英俊」及「唔要GaGa、要加價」。
死撐自然性教育
主持人問Eason會否帶女兒陳康堤到深圳睇騷？他說：「大家真的關心我女兒？放在心就好了，不要掛在嘴邊，太大壓力。」隨即笑指與家人不熟。由於Eason近年不停為巡迴個唱演出，曾揚言有意追多個的他被問到是否擱置計劃？他笑說：「造人幾分鐘就得啦！（咁快？）你嫌快？關你咩事？男人真係幸福，女人就好辛苦！」Eason愈講愈興奮兼露骨，記者示意太三級不能出街，鬼馬的他死撐說：「自然性教育。」
無意破學友紀錄
已做了半百場巡迴個唱的Eason，被問是否有意打破歌神張學友過百場巡迴紀錄時，視學友為偶像的他耍手擰頭說：「唔敢，如果我唱到51歲有140幾場又真係幾勁！（下戰書？）真係唔敢，我暫時接咗差唔多70場，應該過唔到100場。」問到是否有過億元收入？他不置可否說：「冇計，冇check，自動入數，我使費好大。（怕交稅？）香港好多條燈柱、安全島我有份o架！」