謝賢：晨操2日造霆鋒！

拉姑話自己係一個好恨嫁嘅人，我哋結婚都唔夠一年，就問我要唔要細路哥，我話要佢就真係去做喎，又問我鍾意男定女，佢有好多理論嘅：「如果你鍾意男嘅，喺我經期前兩個禮拜，即係安全期前每日食兩打蠔、一件牛扒！」我真係食咗兩個禮拜，到佢月事嚟完，話係排卵期喎，咁就朝頭早六點鐘叫我起身開工（造人）！開完工再瞓過啦吓話？第二朝早六點鐘又叫我起身開工喎，第三日又叫我開工，我話：「得啦，得啦，中咗啦！」黐線架？日日都叫我「開工」？唔可以三日都搞嘢嘛，人嚟架嘛！

食菜戒肉即生婷婷

我以前住間屋好正架，喺相思灣，間屋有花園又對住個海，間房就對正牛尾島，好romantic架，霆鋒就喺嗰度製造出來。呢兩個（仔女）真係特登造出嚟，所以我成日指住個仔話：「你係我特登造出嚟架！唔係我哋兩公婆Happy造出嚟！」等佢珍惜吓生命。婷婷又係，拉姑有日同我講：「喂，排卵期啦，造個女啦。」造女有咩方法呢？佢話要食多啲蔬菜，兩個禮拜唔准我食肉，點知又中咗（懷孕）喎。但有一次喺半島酒店撞到許佩老師，佢一見到我哋兩個喺前面，喺拉姑後面一拍嗌句「拉姑！」點知「噗」一聲就冇咗（ＢＢ），跌咗呀（小產），當時有咗個零兩個月度啦，我冇唔開心，唔通摑許老師一巴呀？之後先再有婷婷，意外嘅嘢就係命，個天係要畀你一個仔一個女。

作為演藝世家接棒人，霆鋒的成就足以繼續省靚謝家招牌。	霆鋒和婷婷都是四哥和拉姑精心炮製的演藝世家接班人。	婷婷五官似老竇，更有四哥標誌的「謝家鼻」。

兩個夠數結紮收爐

兩個夠啦，我成日話自己好有決斷力，婷婷長大到六、七歲，我就自己去Cut咗（結紮），我自紮囉，可以拆嘅，但依家都幾十歲囉，唔拆啦！其實係好簡單嘅手術，同女人差得遠。我重視家庭，如果再生多個，養係無所謂，但教導難嘛，一仔一女幾好呀，咁先會珍惜嘛，我自願去紮，拉姑都唔知，好彩紮咗啫，如果唔係整多件都唔知係邊個嘅哈哈。霆鋒就男仔嘛，感覺似我，婷婷就五官似我，大家都有「謝家鼻」，呢個係標誌。

開通老竇全無代溝

我同仔女從來都冇代溝，總之由細到大佢玩咩我都同佢玩，我最成功一樣嘢係唔會擺老竇款，好多人同個仔講三句嘢就變番老竇，我精呀嘛，霆鋒就蠢啦，佢做黑面，栢芝做白面，佢對啲仔都嚴架。至於栢芝，我覺得好難得搵到一個咁後生，又咁有名嘅人，一結婚就砰一聲生兩件，唔係我點會有孫抱？我嗰頭近啦嘛，佢起碼為頭家做咗兩樣嘢先。

自有天地唔黐仔女

霆鋒心地就極之良善同孝順，所以我唔會怪啲兒女唔黐我，我幾個月都唔使見佢哋，唔會打電話，有時佢返嚟香港打畀我話同啲朋友去玩，我都好開心，我諒解佢，咁辛苦拍戲，唔好成日黐daddy嘛？我好open架，佢哋耐唔耐都會打嚟話食飯見吓咁又點啫？乜唔見面我會唔記得佢哋個樣咩？我都有自己生活，佢哋有時約我食飯，我話唔好啦，我約咗朋友打牌，有時佢哋就約埋二、三十人，都會叫埋我去架。

Profile

姓名：謝賢，原名謝家鈺，又因家中排行第四，被稱「四哥」。

出生日期：1936年8月9日

出道日期：1953年考入嶺光公司演員訓練班，翌年轉投迪華公司，拍下首部電影《樓下閂水喉》。四哥當年拍盡當紅女星嘉玲、南紅、蕭芳芳等，成為紅遍東南亞的粵語片小生。至1979年加入無綫，拍過《千王之王》、《萬水千山總是情》等代表作，1980年代以後開始以玩票性質拍攝電影。